Odd Harald Hovland (A) [13:30:12 ] (ordførar for saka): Eg
vil takke komiteen for godt samarbeid i saka, kor komiteen legg
fram ei samla innstilling.
Bakgrunnen for
saka var det aukande antalet framandkrigarar som reiste til Syria
og Irak for å slutte seg til terrorgrupper. Det førte til at FNs
tryggingsråd 24. september 2014 vedtok resolusjon 2178. Resolusjonen
pålegg FNs medlemsstatar forpliktingar om førebygging av terrorisme
med grenseoverskridande konsekvensar og å gjennomføre tiltak for
å stanse framandkrigarar på veg ut frå medlemsstatane sitt territorium.
I Europarådets
regi vart det framforhandla ein tilleggsprotokoll av 22. oktober
2015 til Europarådets konvensjon om førebygging av terrorisme av
16. mai 2005. Tilleggsprotokollen vart underteikna i Riga og vert
difor kalla Rigaprotokollen.
Europarådskonvensjonen
av 16. mai 2005 om førebygging av terrorisme vart ratifisert av
Noreg 1. februar 2010. Konvensjonen har som formål å auke statspartane sin
innsats for å førebyggje terrorisme og dei negative verknadene det
har for menneskerettane, særleg retten til liv.
Rigaprotokollen
er altså ein tilleggsprotokoll til Europarådskonvensjonen. Protokollen
vart underteikna av Noreg 22. oktober 2015 og tredde i kraft 1. juli
2017, då den var ratifisert av seks statar, kor fire av desse var medlemsstatar
i Europarådet. Per 24. november 2022 er protokollen ratifisert av
26 statar og underteikna av ytterlegare 16 statar.
For å oppfylle
dei folkerettslege forpliktingane etter Rigaprotokollen har det
vore nødvendig med endringar i straffeloven. Dei nødvendige lovendringane
vart vedtekne i lov nr. 50 av 21. juni 2019, med iverksetjing 1. juli 2019.
Rigaprotokollen
byggjer altså på Tryggingsrådets resolusjon 2178 og skal styrkje
statane sine moglegheiter til å forhindre at framandkrigarar reiser
til utlandet for å utføre terrorhandlingar.
Det er vurdert
som viktig at Noreg følgjer opp internasjonale forpliktingar, inkludert
Tryggingsrådets resolusjon 2178, og at det viser at Noreg står saman
med det internasjonale samfunnet i kampen mot terrorisme. Det vert
antatt at protokollen ikkje vil medføre nemnande administrative
eller økonomiske konsekvensar. Protokollen vert antatt å vere ei
sak av særleg stor viktigheit, slik at Stortingets samtykke til
ratifikasjon er nødvendig i medhald av Grunnloven § 26 andre ledd.
Justiskomiteen
har lagt fram ei førebels innstilling for utanriks- og forsvarskomiteen
som viser til justiskomiteens utkast til innstilling i saka, og
har elles ikkje nokon merknader.
Tilrådinga vert
som sagt fremja av ein samla komité, og rår altså Stortinget til
å samtykke i ratifikasjon av tilleggsprotokollen.