Finanstilsynet er det sentrale offentlege organet som
fører tilsyn med at finansinstitusjonane innrettar seg slik at lover
og forskrifter vert følgde. Finanstilsynet skal, ifølgje finanstilsynsloven § 8
andre ledd, kvart år gje Finansdepartementet ei melding om verksemda.
I meldinga omtalar Finanstilsynet organisatoriske tilhøve, rekneskap
og generelle spørsmål knytte til tilsynsarbeidet. Vidare vert det
gjeve ei nærare omtale av arbeidet innanfor dei ulike tilsynsområda. Årsmeldinga
frå Finanstilsynet ligg ved denne meldinga som utrykt vedlegg.
Etter § 1 i finanstilsynsloven fører Finanstilsynet tilsyn
med finansinstitusjonar, som omfattar forretnings- og sparebankar,
kredittføretak, livs- og skadeforsikringsselskap, private, kommunale
og fylkeskommunale pensjonskasser og pensjonsfond, finansieringsselskap,
forsikringsformidlarar, børsar og andre regulerte marknadsplassar. Etter
finanstilsynslova § 1 nr. 14, jf. verdipapirhandelloven § 15-1,
har Finanstilsynet ansvar for å føra tilsyn med verksemda til verdipapirføretak
og oppgjerssentralar, og med at reglane i verdipapirhandelloven
vert følgde. Finanstilsynet har også ansvar for å føra kontroll
med eigedomsmeklarar etter eiendomsmeglingsloven § 8-1, kontroll
med inkassoverksemd etter inkassoloven § 30, kontroll med forvaltning
av verdipapirfond etter verdipapirfondloven § 8-2, tilsyn med revisorar
og revisjonsføretak etter finanstilsynsloven § 1 nr. 9, tilsyn med
sjøtrygdelag, jf. finanstilsynsloven § 1 nr. 12, og tilsyn med føretak
som driv låneformidling, jf. finanstilsynsloven § 1 nr. 7. Finanstilsynet
fører tilsyn med rekneskapsførarar etter finanstilsynsloven § 1 nr.
18. Finanstilsynet fører òg tilsyn med verksemder til filialar av
kredittinstitusjonar og andre finansinstitusjonar frå andre statar
i dei tilfella slikt tilsyn ikkje vert ført av styresmaktene i heimlandet.
Det vert dessutan ført tilsyn med filialar av norske finansinstitusjonar
i utlandet.
Finanstilsynet skal etter finanstilsynslova
sjå til at dei institusjonane det har tilsyn med, verkar på eit
føremålstenleg og trygt vis og i samsvar med lover og føresegner
og det føremålet og dei vedtektene som ligg til grunn for kvar einskild
institusjon. For å utføra tilsynsoppgåvene skal Finanstilsynet granska
rekneskapar og andre oppgåver frå institusjonane, og elles gjera
dei undersøkingane om stillinga og verksemda deira som Finanstilsynet
finn naudsynt, jf. finanstilsynsloven § 3.
Ein viser til meldinga for nærare omtale.
Komiteen tar redegjørelsen
til orientering.