Ved den lokale handsaminga av Aust-Agderpakka
i 1999, jf. St.prp. nr. 30 (2001–2002) om delvis bompengefinansiert
utbygging av deler av E 18 i Aust-Agder, var det lagt til grunn
utbygging av E18 gjennom nesten heile fylket. Grunna nedjustert
bompengebidrag og lågare statleg ramme enn lagt til grunn ved den
lokale handsaminga, blei utbygging av strekninga Vinterkjær–Arendal,
inkl. nytt Vinterkjærkryss, tatt ut av pakka før saka blei lagt
fram for Stortinget.
Gjennom behandlinga av St.prp. nr. 33 (2004–2005)
om gjennomføring av E18 Grimstad–Kristiansand som OPS-prøveprosjekt
med delvis bompengefinansiering, slutta Stortinget seg til ein revidert
finansieringsplan for Aust-Agderpakka, noko som blant anna innebar
utbygging av strekninga Grimstad–Kristiansand til firefelts veg
som OPS-prøveprosjekt. Strekninga Brokelandsheia–Vinterkjær blei
opna for trafikk i 2004 og strekninga Grimstad–Kristiansand stod ferdig
i 2009. Det er også gjennomført ei rekkje trafikksikkerheits- og
kollektivtrafikktiltak langs E18 i fylket.
Innkrevinga av bompengar langs E18 starta i
november 2001 i bomstasjonar i Gjerstad kommune og på kommunegrensa
mellom Grimstad og Lillesand. Det blei lagt til grunn avvikling
av bompengeordninga seinast 1. november 2021.
Samferdselsdepartementet legg i proposisjonen fram
forslag om utviding av Aust-Agderpakka for å finansiera planlegging
av E18 på strekninga Tvedestrand–Arendal samt planlegging og gang-
og sykkelvegutbygging langs E18 og fv. 402. Desse tiltaka blir foreslått
finansierte dels gjennom etablering av ein ny bomstasjon og dels
ved forlenga innkrevjingstid i to eksisterande bomstasjonar med
om lag eitt år. Takstane i kvar av dei to bomstasjonane, den nye
og den gamle ved grensa mellom Lillesand og Grimstad kommunar, blir
halvparten av takstane i den gamle bomstasjonen. Takstane i bomstasjonen
i Gjerstad kommune blir uendra.
Den lokale handsaminga til utvida Aust-Agderpakke
er nærare omtala i pkt. 3 i proposisjonen. Statens vegvesen har
i etterkant av den lokale handsaminga gjort ei vurdering av trafikale
endringar ved etablering av ein ny bomstasjon og halvering av takstane
i eksisterande bomstasjon i Lillesand. Figur 4.1 i proposisjonen
viser dagens trafikk på vegnettet med takstar på kr 30/60 for lette/tunge
kjøretøy i dagens bomstasjon på kommunegrensa mellom Lillesand og
Grimstad, og forventa trafikale endringar når takstane blir halverte
i denne bomstasjonen, og det blir etablert ein ny bomstasjon på
E18 vest i Lillesand med same takstnivå.
Samferdselsdepartementet meiner forslaget til ny
bomstasjons- og innkrevjingsstruktur for Aust-Agderpakka er ei fornuftig
betring. Delt innkrevjing med fleire bomstasjonar kombinert med
lågare takstnivå per bomstasjon, gir ei meir rettferdig innkrevjing
med betre samsvar mellom betaling og nytte. Det foreslåtte opplegget vil
føra til at fleire trafikantar som har nytte av ny E18, vil betala
bompengar.
Gjennom handsaminga av Ot.prp. nr. 15 (2007–2008)
er det opna for å nytta bompengar til drift av kollektivtrafikk
i einskilde tilfelle. Høvet er likevel avgrensa til byområde når
bruken inngår i ein plan for eit heilskapeleg og samordna transportsystem.
Det er derfor ikkje heimel for å nytta bompengar til bussdrift mellom
Arendal og Kristiansand. Bussdrift her er eit fylkeskommunalt ansvar.
Samferdselsdepartementet meiner det i denne omgang
ikkje er aktuelt å setja av bompengar som bidrag til bygging av
nytt Vinterkjærkryss, då krysset ikkje er fullfinansiert med 50
mill. kroner i bompengetilskot. Prioritering av Vinterkjærkrysset
kan først bli avklara i 2013 i samband med Nasjonal transportplan
2014–2023.
På denne bakgrunn legg departementet opp til utviding
av Aust-Agderpakka med ei samla økonomisk ramme på inntil 200 mill.
kroner. Tiltaka er vist i tabell nedafor.
Utviding av Aust-Agderpakka
– Planleggingsmidler til E18
Tvedestrand–Arendal | inntil 50 mill. kr |
– Planlegging og bygging av
g/s-veg fv. 402 Storemyr–
Birkeland | inntil 100 mill. kr |
– Planlegging og bygging
av g/s-veg E18 Tvedestrand–
Lillevåje | inntil 40 mill. kr |
Sum | inntil 190 mill. kr |
Departementet føreset at ramma på 200 mill. kroner
står fast ved ev. kostnadsauke på gang- og sykkelvegprosjekta. Departementet
sluttar seg til fylkeskommunen sitt forslag til bomstasjonsplassering,
takstar og rabattar. Truleg vil dagens ordning vera nedbetalt tidleg
i 2018, altså over tre år tidligare enn opphavleg lagt til grunn.
På basis av dette er det rekna at innkrevjingstida blir om lag eitt
år lengre, til 2019, for å dekka utvidinga på 200 mill. kroner.
Etter at Stortinget har fatta vedtak om utviding av
Aust-Agderpakka, vil det bli inngått avtale mellom Vegdirektoratet
og bompengeselskapet i tråd med føresetnadene lagt til grunn i proposisjonen.