Oddbjørg Ausdal Starrfelt (A):
Eg
tillet meg å stilla fylgjande spørsmål til sosialministeren:
Mange pensjonistar som har tent opp
tilleggspensjonar gjennom mange år i arbeidslivet, er no usikre på kva
konsekvensar ein auke i minstepensjonen på kr 1.000 pr månad vil få for dei.
Korleis ser statsråden på dette, og
kva tiltak vil ho setja i verk for å hindra ei urettvis handsaming av
pensjonistar med små tilleggspensjonar?
Statsråd Magnhild Meltveit Kleppa:
Minstepensjonistar i folketrygda i dag omfattar både pensjonistar utan
tilleggspensjon og pensjonistar med tilleggspensjon som er lågare enn
særtillegget.
Pensjonar frå folketrygda er som kjent
sett saman av grunnpensjon, tilleggspensjon og/eller særtillegg. Summen
utgjer minsteforsikringa i folketrygda, det vil seia minstepensjonen.
Ein auke i minstepensjonane på
1.000 kr i månaden, som Regjeringa håpar å få fleirtal for, vil såleis også
koma pensjonistar med låge tilleggspensjonar til gode. Auken vil variera i
storleik ut frå kor mykje som manglar for å sikra ein samla pensjon på det
nye nivået for minstepensjonen. I hovudsak vil ein slik auke gjelda
tidlegare deltidsarbeidande kvinner og/eller kvinner med ein kort yrkesaktiv
periode etter 1967, då folketrygda blei innført.
Ein auke av minstepensjonen vil elles
ikkje få konsekvensar for andre pensjonistar med tilleggspensjon. Dei vil
på vanleg måte få pensjonane regulerte i samsvar med auken i grunnbeløpet.
Representanten Ausdal Starrfelt spør
kva tiltak vi vil setja i verk for å hindra ei urettferdig behandling av
pensjonistar med låge tilleggspensjonar. Sidan alle med tilleggspensjonar
under minstepensjonsnivå også vil få auka pensjonen, kan eg ikkje direkte
sjå noka urettferdig behandling her.
Det er vanskeleg å skjøna innvendingar
til ei forbetring som særleg gjeld for kvinner med inga eller låg opptening
i folketrygda. Desse kvinnene har utført storparten av arbeidsinnsatsen sin
i heimen etter at folketrygda vart innførd i 1967. Dei har heller ikkje
fått nytte av nyordninga med poeng for omsorgsarbeid frå 1992, slik
framtidas pensjonistar får.
Eg er kjend med at mange pensjonistar
blir vonbrotne når dei trass i å ha utvist ein viss yrkesaktivitet blir
minstepensjonistar. Dette vil eg ikkje kalla urettferdig, men eit utslag av
den sosiale fordelinga i folketrygda sitt pensjonssystem, dvs. fordeling frå
menn til kvinner og frå yrkesaktive til ikkje yrkesaktive.
Auka minstepensjon er ein del av
Regjeringa sitt mål om å betra forholda for grupper som er økonomisk svakt
stilte.
Sjølv om minstepensjonane har auka
prosentvis nokså bra dei siste åra, blir auken ikkje så stor i kroner. Frå
1990 finn vi ein auke på om lag 16.000 kr. Eit monaleg løft slik Regjeringa
no ynskjer, er både rimeleg og rettferdig etter mi vurdering. Etter kvart
som fleire og fleire tener opp eigen tilleggspensjon i folketrygda, vil
ordninga med særtillegg og minsteforsikring omfatta stadig færre, men det
vil vera ei viktig forsikring for dei det gjeld.
Oddbjørg Ausdal Starrfelt (A):
Eg vil
takka statsråden for svaret. Eg har høyrt påstått at ein må tena ca
140.000 kr i året for å tena opp til tilleggspensjon tilsvarande desse 12.000
kronene i året, dersom det skulle verta tilleggspensjonen. Mange, særleg
kvinnene i låglønsyrke og/eller deltidsarbeid, tener mindre enn 140.000 kr i
året. Dei betaler og har betalt trygdeavgift ut frå ei forventing om at dei
vil få tilleggspensjon. Som eg no forstår statsråden, vil desse tillegga no
verta etne opp av minstepensjonen. Ser ikkje statsråden dette som eit
løftebrot, og vil ho vurdera dette nærare før eller i samband med
trygdeoppgjeret i vår?
Statsråd Magnhild Meltveit Kleppa:
Det er ei side her som undrar meg, og det er den argumentasjonen som
Arbeidarpartiet fører i denne saka i forhold til kva som blir resultatet.
Kva er det som faktisk er tilfellet? Jo, for det fyrste blir
minstepensjonistane - altså ei av dei gruppene som har sakka akterut i
velstandsutviklinga - etter dette forslaget løfta, i tillegg får nokre
fleire med små tilleggspensjonar endå meir å klara seg med i kvardagen, og
det siste: Det er ingen som etter denne ordninga får mindre utbetalt enn det
dei har i dag. Dette handlar altså om eit forslag som skal syta for ei meir
rettferdig fordeling av goda.
Oddbjørg Ausdal Starrfelt (A):
Eg
takkar igjen for svaret. Eg kjenner mange pensjonistar med små
tilleggspensjonar som er veldig urolege for dette. Dette løftet vil kosta
ganske mykje pengar, og eg går ut frå at det òg er grenser for kor mykje
meir pengar den nye regjeringa har å dela ut. Kan me risikera at dette går
ut over andre pensjonistar, f.eks ved reduksjon i bustøtta, som er retta mot
dei økonomisk sett mest vanskeleg stilte pensjonistane, og f.eks ved at
grunnbeløpet i folketrygda ikkje vert regulert i tråd med inntektsutviklinga
elles ved pensjonistoppgjeret i vår?
Statsråd Magnhild Meltveit Kleppa:
Eg
deler representanten Ausdal Starrfelt sitt syn på at trygdeoppgjeret skal gå
sin gang slik som det pleier. Dette er ikkje eit inngrep i forhandlingane
om grunnbeløpet, men det er eit signal om at Regjeringa ynskjer å løfta
nokre av dei gruppene som har minst i dette samfunnet.
Regjeringa er altså oppteken av å
sikra ein grunntryggleik når det gjeld økonomi, og eg håper og trur at
solidariteten i det norske folket er meir utbreidd enn det som
Arbeidarpartiet synest å meina. Dette handlar om eit handslag til ei av dei
gruppene som har minst. Eg trur faktisk mange yrkesaktive med ulik inntekt
er einige med Regjeringa i at det er betre å sikre fleire ein grunntryggleik
enn å gjera endå fleire til klientar i ulike system.