Medlemmene i delegasjonen
Sjå oversikt over medlemmene i delegasjonen
Kontaktinformasjon
Sekretariatsfunksjonen for Stortingets delegasjon til EFTA og EØS blir teken hand om av internasjonal avdeling.
E-post: postmottak.internasjonal@stortinget.no
Om EFTA, EØS og den norske delegasjonen
Stortingets parlamentarikardelegasjon til EFTA og EØS har rådgivande funksjonar overfor EFTAs ministerråd (EFTAas handelsministrar) og EØS-rådet (EØS-/utanriks- eller europaministrane i EFTA-landa) og fungerer som bindeledd til nasjonalforsamlingane i dei andre EFTA-landa.
EØS-avtalen er Noregs mest omfattande internasjonale avtale og har dei siste 20 åra sikra Noreg full tilgang til den indre marknaden i EU. I same periode har Noreg gjennom EFTA inngått eit omfattande nettverk av handelsavtalar med land over heile verda. EFTA har sidan skipinga i 1960 vore ein handelsorganisasjon med fokus på økonomisk integrasjon. Med EØS-avtalen som tredde i kraft i 1994, vart samarbeid med EU betrakteleg utvida til å dekkja dei fleste politikkområde. Europapolitikken har på denne måten vorte mykje meir enn handelspolitikk, og like mykje innanrikspolitikk som utanrikspolitikk. Frå Stortinget si side har det derfor vore viktig med brei deltaking frå dei fleste fagkomiteane på Stortinget i EFTA/EØS-delegasjonen.
EFTA/EØS-delegasjonen deltek i EFTAs parlamentarikarkomité, der han møter kollegaer frå Island, Liechtenstein og Sveits. Komiteen utgjer eit rådgivande organ til EFTAs ministerråd (handelsministrane i EFTA-landa), der fokus er på EFTAs frihandelsavtalar. Komiteen gir innspela sine til pågåande frihandelsforhandlingar og gir med dette arbeidet EFTA gjer med frihandelsavtalane ein viktig parlamentarisk dimensjon.
EFTA/EØS-delegasjonen deltek òg i den felles EØS-parlamentarikarkomiteen saman med medlemmer frå Europaparlamentet. Her står ulike spørsmål knytte til EØS-avtalen på dagsordenen. Komiteen gir i fråsegner og resolusjonar til EØS-rådet (EØS/EFTA-landa utanriks- eller europaministrar) sine vurderingar av utviklinga i EØS og sine tilrådingar med omsyn til spesifikke saker på ulike politikkområde.
Historie
I 1977 vart det oppretta ein eigen komité for parlamentarikarar frå EFTA-landa. Uformelle kontaktmøte mellom EFTA-parlamentarikarar hadde då blitt haldne sidan 1963 i samband med sesjonane til Europarådet i Strasbourg.
Frå 1989 bestod den norske parlamentarikarkomiteen til EFTA av fem faste medlemmer og fem varamedlemmer valde første året i stortingsperioden for fire år.
Etter at EØS-avtalen tredde i kraft 1.1.94 vedtok Stortinget 1.2.94 å oppretta ein parlamentarikar-delegasjon til EFTA og EØS med seks medlemmer og seks varamedlemmer. I 2009 vart vara-lista utvida til 10 representantar for å inkludera så mange fagkomitear som mogleg i delegasjonen. Delegasjonen blir vald første året i stortingsperioden for fire år om gongen.
Sjå òg
Nettstaden til EFTA
Om Europautvalget
Stortingets delegasjon til EFTA-parlamentarikarkomiteane og Den felles EØS-parlamentarikarkomiteen kjem kvart år med ei årsmelding som blir behandla av Stortinget.
Årsrapport fra Stortingets delegasjon til EFTA-parlamentarikerkomiteene og Den felles EØS-parlamentarikerkomiteen