Presidenten [10:00:07 ]: Vyrde medrepresentantar! Me
minnest tidlegare stortingsrepresentant Arent Mikal Henriksen, som
gjekk bort 7. november 2024, 78 år gamal.
Arent M. Henriksen representerte SV frå Sør-Trøndelag
i til saman tolv år. Han sat på Stortinget i periodane 1973–1977
og 1981–1989. Han var medlem av finanskomiteen heile åttitalet.
Historia i partiet er at han som finanspolitisk ansvarleg knuste
mang ein ønskedraum. Det er vel ein tradisjon alle finanspolitikarar
kan kjenna seg att i.
Henriksen kom frå Salten, med ein bakgrunn
som forma både det politiske prosjektet hans og verdiane hans. Han
hadde eit sterkt engasjement for arbeid, næringsliv og levekår,
særleg for dei som hadde minst.
Han engasjerte seg tidleg i politikken, og
han var aktiv i AUF før han vart medlem i det som etter kvart vart SV.
Han var oppteken av at politikk måtte føra
til reell endring. Arent M. Henriksen var difor ein talsmann for samarbeid
på venstresida, og ein av dei som meinte at det var nødvendig å
byggja breie politiske alliansar for å få gjennomslag. Det var ikkje
først og fremst partipolitiske markeringar som dreiv han – det var
ønsket om å betra folks liv.
Henriksen var ein nøktern og rasjonell folkevald, kjent
for å stilla kritiske spørsmål òg i eige parti. Han forvalta midlane
til fellesskapen med varsemd og meinte at ansvarlegheit og solidaritet
måtte gå hand i hand.
Etter tida på Stortinget tok han med seg det
same engasjementet tilbake til lokalsamfunnet, m.a. som ordførar
i Bjugn kommune. Han heldt fast ved den same grunnleggjande overtydinga:
at politikk skal tena fellesskapen, og særleg dei som treng det
mest.
Arent hadde fleire framståande posisjonar i
offentlegheita etter åra på Stortinget. Han var generalsekretær i
Noregs Fiskarlag, direktør for Fosen Mekaniske Verksteder og styreleiar
i NSB.
Henriksen vil bli hugsa som ei stillferdig,
men tydeleg stemme – ein mann med integritet, realpolitisk kløkt og
eit stort hjarte for dei som elles ofte fell utanfor dei politiske
sirklane.
På vegner av Stortinget uttrykkjer eg vår takk
for innsatsen han la ned i teneste for demokratiet og fellesskapen.
Vi lyser fred over minnet hans.
Presidenten [10:03:38 ]: Representantane
Kjell Ingolf Ropstad , Mani Hussaini , Turid Kristensen ,
Else Marie Rødby , Tobias Hangaard Linge , Morten Wold ,
Ove Trellevik , Willfred Nordlund ,
Hadia Tajik , Linda Hofstad Helleland , Maria Aasen-Svensrud ,
Erlend Wiborg og Kjerstin Wøyen Funderud , som har vore permitterte, har
igjen teke sete.
Dei følgjande innkalla vararepresentantane
tek no sete:
For Aust-Agder: Ramani Nordli
For Hedmark: Per Martin Sandtrøen
Presidenten [10:05:47 ]: Representantforslaga
vil verta handsama etter reglementet.
Før sakene på dagens møtekart vert tekne opp
til handsaming, vil presidenten opplysa om at møtet i dag held fram
utover kl. 16.
Sakene nr. 1 og 2 vil bli behandla under eitt.