Frank Edvard Sve (FrP): Kan samferdselsministeren bekrefte at Statens vegvesen region midt har forbrukt midlar til grunnkjøp i prosjektet Møreaksen, beløp og kven som har gjeve løyve til dette?
Grunngiving
Det er kome fram informasjon som hevdar at Statens vegvesen region midt, har brukt midlar til grunnerverv i samband med prosjektet Møreaksen.
Dette prosjektet ligg langt bak i køa for store samferdselsprosjekt her i landet, og har ikkje vorte endeleg behandla for oppstart i Stortinget.
Dei byggeklare store samferdselsprosjekta slik som E-134 Oslofjordforbindelsen, E-134 Saggrenda-Elgsjø, E-134 Røldal-Seljestad, E-16 Hylland-Sløen, og E-6 Megården- Morsvikbotn, er utsatt på ubestemt tid av regjeringa.
Mykje tyder på at både prosjektering og framdrift er i stampe i desse prosjekta med bakgrunn i manglande løyvingar over statsbudsjettet til dette.
Dette er dei fem topprioriterte prosjekta i heile landet, som altså ikkje frå nødvendige planleggingsmidlar for vidare framdrift. Vi stilte spørsmål om kva dei ulike prosjekta måtte ha for nødvendig framhald i planlegging og prosjektering i 2023, og departementet har synleggjort dette for kvar av prosjekta.
Samla er dette 715 mill. kr for 2023 som regjeringa ikkje har løyvd. I tillegg har regjeringa kutta heile 30 % av planleggingsportefølja til Statens vegvesen, der direktør i STVV varslar ytterlegare kutt i planlegging av veg i 2023 over heile landet.
Samtidig opplever vi at svært store summar blir forbrukt av Vegdirektoratet gjennom Statens vegvesen til prosjekt som ligg langt bak i køa, og slett ikkje på nokon som helst måte verken er prioritert eller byggeklare.
Døme på dette er ukritisk pengebruk av skattebetalarane sine pengar på prosjektet Møreaksen i Møre og Romsdal, eit prosjekt til mange titals milliard kr i ei fjordkryssing for kun 2 300 bilar i døgnet. Det høyrer med til historia at dette prosjektet vil heller ikkje folket ha.
Frå før har det blitt forbrukt millionbeløp til planlegging av Møreaksen i 2022, pengebruk på eit prosjekt som overhode ikkje verken er eller blir byggeklart på lang, lang tid.
No vert det også hevda at det same Vegdirektoratet via Statens vegvesen region midt har brukt midlar til grunnkjøp på Møreaksen, eit prosjekt som overhode ikkje er vedteke skal byggast.