Jenny Klinge (Sp): Er statsråden einig i at merkinga av royalbehandla kledning i CE klasse D var i tråd med offentleggjorte reglar og europeisk praksis fram til og med desember 2020, og viss ikkje, når og på kva måte meiner statsråden at regelverket vart endra?
Grunngiving
Statsråden viser i svaret sitt på det skriftlege spørsmålet frå meg av 25.05.2021 (Dokument nr. 15:2277 (2020-2021)) til den forståinga av det nasjonale og felleseuropeiske regelverket som gjeld no. Statsråden viser òg til den europeiske samordningsgruppa for tekniske kontrollorgan under byggevareforordninga og deira retteleiing. Tidspunktet for offentleggjeringa eller på kva måte den nemnte rettleiinga vart offentleggjort går likevel ikkje fram av svaret.
Etter samtale med dei norske produsentane av royalbehandla kledning, har eg fått opplyst at europeisk praksis, så langt ein har hatt høve til å undersøke, har vore at både ubehandla og behandla kledning har kunna bli CE-merka med klasse D, utan at det var eit særskilt krav til testing av branneigenskapar. Produsentane har også fremheva at det per desember 2020 ikkje var publisert noko pålegg eller ei rettleiing som inkluderte eit slikt krav om branntesting.
Spørsmålet om merkinga var korrekt fram til desember 2020 har enorm betydning for produsentane av royalbehandla kledning. Ei feilmerking som inneber ein kjøpsrettsleg mangel, vil kunne medføre konkursar, med påfølgande tap av arbeidsplassar og vesentlege verdiar. Dette er hjørnesteinsbedrifter som er svært viktige for lokalsamfunna sine. Desse viktige arbeidsplassane - og ringverknadene og verdiane som aktiviteteten til bedriftene skaper – er vanskeleg å bygge opp igjen eller erstatte.
Eg håpar derfor at statsråden ser at det er viktig å få avklart om produsentane har forhalde seg til det regelverket som heile tida var offentleg tilgjengeleg.