Nils T. Bjørke (Sp): Verneområda rundt Folgefonna har stor lokal støtte. Støtta heng saman med at det vert drive aktivt landbruk her som tek vare på det flotte kulturlandskapet. Difor er det uheldig at nasjonale myndigheiter - utan å setja seg inn i saka - overprøver lokale vedtak i Kvinnherad kommune og eit samla Folgefonna Nasjonalparkstyre i å gje løyve til at unge bønder skal få dyrka litt av jorda for å halda oppe drifta og produsera mat i desse områda.
Vil landbruksministeren ta initiativ for å sikra at dei lokale vedtaka blir ståande?
Grunngiving
Folgefonna nasjonalparkstyre gjorde vedtak den 24.09.2020 om nydyrking av eit areal på 37,5 dekar på gnr. 87 bnr. 12 i Kvinnherad kommune i Hattebergsdalen landskapsvernområde. Kvinnherad kommune og Folgefonna nasjonalparkstyre hadde gjort grundige vurderingar med synfaring. Statsforvaltaren i Vestland klaga på vedtaket, og Miljødirektoratet endra Folgefonna nasjonalparkstyre sitt vedtak og gav avslag på søknaden om nydyrking den 01.03.2021.
Saka handlar om unge bønder som ynskjer å satsa i eit kulturlandskap det er viktig å halda levande. Området er tilpassa distriktslandbruk i småskala. Om slikt vestlandslandbruk framleis skal vera drivverdig, må dei som ynskjer å satsa kunna utnytta ressursane på areal som har vore i bruk.
I denne saka har dei lokale myndigheitene funne fram til ei god løysing i felleskap for å handtera både verneinteressane og bøndene sine behov. Det at Miljødirektoratet overprøver denne løysinga svekkar den lokale oppslutnaden om verneområda.