Minnetale over tidlegare stortingsrepresentant
Erling Folkvord
Presidenten [10:00:12 ]: Vyrde medrepresentantar!
Den 1. mars 2024 døydde tidlegare stortingsrepresentant
Erling Folkvord, 74 år gamal. Han var då på ei reise i Stockholm
i samband med eit bokprosjekt om Kurdistan og Palestina. Han hadde
tidlegare reist ei rekkje gonger til Midtausten og teke lærdomar
med heim. Han bidrog til at nordmenn fekk auga opp for kurdaranes
sak. Han hadde eit sterkt engasjement for internasjonal solidaritet.
Erling Folkvord blei fødd 15. juni 1949 og
vaks opp på eit småbruk like nord for Levanger. Bestefaren var husmannsson
og den einaste gardbrukaren i området som, ifølgje Erling Folkvords
eigne skildringar, hadde heist flagget 1. mai i dette området i
mellomkrigstida.
Erling Folkvord tok sosionomutdanning og jobba
i rusomsorga i Oslo, der han også var tillitsvald og leiar for Sosiale
Etaters Fagforening i ein periode.
Han blei vald til bystyret i Oslo fyrste gongen
i 1983 og siste gongen i 2007, før han gav stafettpinnen vidare.
Som folkevald blei han kjend som ein prinsippfast og
ubestikkeleg ombodsmann for innbyggjarane. Han åtvara mot at fellesskapets
midlar blei sløste vekk, både ved sal av sjukehusbustadene i Oslo
og ved kjøp av ei tomt til ein sjukeheim i Spania, som aldri blei
realisert. Han avdekte og tok eit grundig oppgjer med korrupsjon og
inhabilitet, m.a. gjennom fleire bøker.
Folkvord var nestleiar i Raud Valallianse frå
1989 og i Arbeidernes Kommunistparti på 1990-talet. I 1993 blei Folkvord
vald til Stortinget, der han blei Raud Valallianses fyrste og einaste
representant. Politikarar frå alle sider har anerkjent, om ikkje
alltid verdsett, hans engasjement og standhaftigheit.
Frå 2007 var Erling Folkvord lokalpolitikar
og stortingskandidat for Raudt og aktivt medlem. Han samarbeidde
med aksjonistar og aktivistar, fagforeiningar og lokale velforeiningar
og har fått eit høgt antal kondolansar frå både inn- og utland som
vitnar om eit breitt politisk virke. Han har vore ein markant skikkelse
i norsk politikk og i historia til norsk venstreside.
Me lyser fred over Erling Folkvords minne.
Representantane høyrde ståande på presidentens minnetale.
Presidenten [10:03:38 ]: Representantane
Jan Tore Sanner , Himanshu Gulati , Sigurd Kvammen Rafaelsen , Ove Trellevik , Hans Inge Myrvold ,
Linda Monsen Merkesdal , Ola Elvestuen , Olaug Vervik Bollestad ,
Terje Halleland , Ingvild Kjerkol og
Lars Haltbrekken , som har vore permitterte,
har igjen teke sete.
Den innkalla vararepresentanten for Akershus,
Tobias Hangaard Linge , tek no sete.
Det ligg føre to permisjonssøknader:
frå Arbeidarpartiets stortingsgruppe
om velferdspermisjon for representanten Ragnhild Male Hartviksen i tida frå og med 27. november
til og med 5. desember
frå Høgres stortingsgruppe om permisjon for representanten
Ingjerd Schie Schou i tida frå og med 27. til
og med 29. november for å delta i møte i Europarådets parlamentarikarforsamling
i Luxembourg
Etter forslag frå presidenten vart
samrøystes vedteke:
Søknadene blir handsama straks og innvilga.
Følgjande vararepresentantar blir innkalla for å møta i
permisjonstida slik:
For Akershus: Anita Patel for
27.–28. november og Tobias Hangaard Linge 3.–5. desember
For Østfold: Fredrik Holm 27.–28. november
Val av setjepresident
Presidenten [10:04:49 ]: Presidenten
vil gjera framlegg om at det blir vald ein setjepresident for stortingsmøtet
i dag – og ser det som vedteke.
Presidenten tilrår Liv Kari Eskeland. – Andre
framlegg ligg ikkje føre, og Liv Kari Eskeland er vald som settepresident
for stortingsmøtet i dag.
Statsråd Tonje Brenna la
fram 17 kgl. proposisjonar (sjå under Referat).
Presidenten [10:06:38 ]: Representanten
Christian Tybring-Gjedde vil setja fram eit representantforslag.
Christian Tybring-Gjedde (uavh.) [10:06:56 ]: På vegne av
meg selv vil jeg fremme et representantforslag om å nedsette et
utvalg med representanter fra ulike beredskapsinstanser og Forsvaret
for å utrede hvordan man kan utnytte sosiale medier for å videreformidle grunnleggende
kunnskap om totalforsvaret.
Presidenten [10:07:17 ]: Framlegget
vil bli handsama etter reglementet.
Sakene nr. 1 og 2 blir handsama under eitt.