Interpellasjon fra representanten Jon Lilletun til utenriksministeren:
"På Cuba har det den seinare tid vore ein auke i arrestasjonar av opposisjonelle, uavhengige journalistar og representantar for det sivile samfunn. Denne bølgja av arrestasjonar strir mot prinsippet om ytringsfridom, og styresmaktene på Cuba bryt dei grunnleggjande sivile og politiske rettane. Makteliten på Cuba har ikkje vist nokon reformvilje, trass i internasjonale fordømmingar. Noreg har i FN teke avstand frå brota på menneskerettane og mangel på demokrati på Cuba. Noreg har gjeve uttrykk for at den beste måten å oppnå reformer på er ved kontakt med cubanarane, og Noreg hadde difor tidlegare ein dialog med Cuba om menneskerettar. Denne dialogen vart suspendert av Cuba i 2000.
Korleis kan den norske Regjeringa medverke til demokratiske reformer og auka respekt for menneskerettane på Cuba?"