Som det går fram av Prop. 182 S (2012–2013), utarbeidde Hitra, Frøya og Snillfjord kommunar og Sør-Trøndelag fylkeskommune i 2009 ein plan for delvis bompengefinansiert utbygging av delar av fv. 714 mellom Stokkhaugen og Sunde. Trinn 1 er delvis opna, delvis under ferdigstilling. Trinn 2 blir lagt fram i denne proposisjon.

Det er gjennomført ekstern kvalitetssikring (KS2) av prosjektstyringsunderlag, samfunnsøkonomisk analyse, kostnadsoverslag og trafikkgrunnlag for trinn 2. Ved den lokalpolitiske handsaminga av prosjektet vart det lagt til grunn eit samla kostnadsoverslag (styringsramme) for utbygginga på 1 667 mill. 2017-kroner. Ekstern kvalitetssikrar tilrår ei styringsramme på 1 650 mill. 2016-kroner og ei kostnadsramme på 1 840 mill. 2016-kroner. I samråd med Sør-Trøndelag fylkeskommune blir resultatet frå den eksterne kvalitetssikringa lagt til grunn for utbyggings- og finansieringsopplegget for prosjektet. Rekna om til 2017-prisnivå gjev dette ei styringsramme på 1 691 mill. kroner og ei kostnadsramme på 1 886 mill. kroner.

Prosjektet sin samfunnsøkonomiske netto nytte er rekna til om lag -190 mill. 2017-kroner. Netto nytte pr. budsjettkrone er rekna til -0,3. Netto nytte over totale kostnader er rekna til -0,1.

Forslag til opplegg for utbygging og finansiering av prosjekt og tiltak på fv. 714 Stokkhaugen–Sunde, trinn 2, blei handsama av aktuelle kommunar og Sør-Trøndelag fylkeskommune i juni 2016.

Finansieringa av trinn 2 er basert på bompengar og fylkeskommunale midlar.

I tråd med dei lokalpolitiske vedtaka er det lagt til grunn at 44 pst. av utbyggingskostnadene blir finansierte med fylkeskommunale midlar. Med utgangspunkt i ei styringsramme for prosjektet på 1 691 mill. 2017-kroner, blir samla fylkeskommunalt bidrag 744 mill. kroner. Av dette har fylkeskommunen alt løyvd 252 mill. kroner.

Det er lagt opp til at prosjekta i trinn 2 blir delfinansierte med bompengar ved å vidareføre eksisterande innkrevjing i bomstasjonane på Valslag og ved Våvatnet etter at trinn 1 er nedbetalt i 2018. Det er lagt til grunn innkrevjing i om lag 15 år, frå 2019 til 2033.

For at prosjektet skal vere nedbetalt i løpet av 15 år, er det rekna ut at gjennomsnittleg inntekt pr. passering må vere på 75 kroner i bomstasjonen på Valslag og 58 kroner i bomstasjonen ved Våvatnet. Brutto bompengeinntekter i 2017-kroner er rekna til om lag 1 300 mill. kroner. Av dette er 947 mill. kroner føresett nytta til å dekkje delar av investeringskostnadene, om lag 260 mill. kroner til å dekkje finansieringskostnader og om lag 90 mill. kroner til å dekkje innkrevjingskostnader og kostnader til drift av bompengeselskapet.

Fylkestinget i Sør-Trøndelag har vedteke å stille garanti ved sjølvskuldnarkausjon for eit bompengelån på maksimalt 1 018,1 mill. kroner til finansieringa av prosjektet.