Til Stortinget

Samandrag

I proposisjonen legg departementet fram endringsforslag på statsbudsjettet for 2001.

Kap. 900 og 3990 Nærings- og handelsdepartementet

I statsbudsjettet for 2001 er det innført ei ordning der pårekna utgifter til meklarhonorar og annan nødvendig fagleg bistand ved aksjesal er lagt inn med øyremerkt beløp under kap. 900 post 21, jf. St.prp. nr. 1 (2000-2001). Det er gjennomført nedsal i A/S Olivin (til 51 pst.), Arcus AS (til 34 pst.) og heile den statlege aksjeposten i Norsk Medisinaldepot ASA. Salet av aksjane i Norsk Medisinaldepot ASA er gjennomført i september etter fullmakt gitt av Stortinget ved handsaminga av St.prp. nr. 84 (2001-2002), jf. Innst. S. nr. 325 (2000-2001). Brutto salsbeløp på om lag 468,3 mill. kroner er føreslått løyvd som inntekt under kap. 3900 post 90. Transaksjonskostnadene for dei tre aksjesala utgjer om lag 18,6 mill. kroner. Departementet gjer framlegg om auka løyving til transaksjonsutgifter ved sal av aksjar i 2001 under kap. 900 post 21 med 8,6 mill. kroner.

Kap. 911 Bedriftsretta kompetanseoverføring

Departementet sine kostnader knytt til SMB- og Joint Venture-programma og Program for næringsliv og entreprenørskap i 2001 aukar til 13,6 mill. kroner. Det er 3,9 mill. kroner meir enn det ein rekna med ved starten av året. Departementet gjer framlegg om at meirforbruket dels skal dekkjast ved intern omdisponering av 1,2 mill. kroner frå handlingsplanen for små verksemder og dels ved overskriding/auking av programløyvinga for 2001 med 2,7 mill. kroner, med tilsvarande innsparing/nedsett programløyving på statsbudsjettet for 2002, jf. St.prp. nr. 1. Tillegg nr. 4 (2001-2002).

Kap. 922 Norsk Romsenter

I budsjettet for 2000 er det lagt til grunn at dei årlege løyvingane til Norsk Romsenter skal justerast i høve til eurokursen. For 2001 gjer ein på dette grunnlaget framlegg om å redusere løyvinga til Norsk Romsenter med 7,2 mill. kroner frå 246,7 mill. kroner til 239,5 mill. kroner.

Kap. 956 (nytt) Norsk Jern Eiendom A/S

På statsbudsjettet for 1991 fekk departementet fullmakt til å garantere for at Norsk Jern Eiendom A/S (NJE) skulle haldast skadeslaus for eventuelle framtidige kostnader som følgje av pålegg frå Statens forureiningstilsyn knytt til avfallsprodukt som Norsk Koksverk A/S hadde grave ned på tomta til NJE. Departementet gjer framlegg om ei løyving på 2,1 mill. kroner som refusjon for utførte miljøtiltak på statsbudsjettet 2001.

Kap. 2420 Statens nærings- og distriktsutviklingsfond (SND) (jf. kap. 5320 og 5620)

Samanlikna med saldert budsjett for 2001 gjer departementet framlegg om å redusere løyvinga til innlån til SND si risikolåneordning med 185 mill. kroner, frå 5,5 mrd. kroner til 5,315 mrd. kroner. Løyvinga til innlån til SND si grunnfinansierings- og lågrisikolåneordning reduserast med 1,64 mrd. kroner, frå 38,5 mrd. kroner til 36,86 mrd. kroner.

Kap. 5320 og 5620 Statens nærings- og distriktsutviklingsfond (SND) (jf. kap. 2420)

Departementet gjer framlegg om å redusere løyvinga til avdrag frå SND si risikolåneordning med 210 mill. kroner, frå 5,45 mrd. kroner til 5,24 mrd. kroner. Løyvinga til avdrag frå SND si grunnfinansierings- og lågrisikolåneordning reduserast med 6,23 mrd. kroner, frå 38,5 mrd. kroner til 32,27 mrd. kroner. Årsaka er mellom anna at SND har tatt opp lån med lengre løpetid og dermed færre forfall og opptak av nye lån. Departementet gjer vidare framlegg om at renteinntekta frå innlån til risikolåneordninga aukast med 18 mill. kroner og renteinntektene frå innlån til grunnfinansierings- og lågrisikolåneordninga reduserast med 56 mill. kroner, frå 715 mill. kroner til 659 mill. kroner.

Tilråding frå komiteen

Komiteen, har ingen merknader, viser til proposisjonen og rår Stortinget til å gjere slikt

vedtak:

I statsbudsjettet for 2001 blir det gjort følgjande endringar:

Oslo, i næringskomiteen, den 29. november 2001