Skriftlig spørsmål fra Hadia Tajik (A) til olje- og energiministeren

Dokument nr. 15:1275 (2022-2023)
Innlevert: 08.02.2023
Sendt: 08.02.2023
Besvart: 16.02.2023 av olje- og energiminister Terje Aasland

Hadia Tajik (A)

Spørsmål

Hadia Tajik (A): Kva er NVEs kapasitet til å handsame konsesjonssøknader på solkraft framover, og kva planer har statsråden for å styrke dette arbeidet?

Begrunnelse

2022 vart eit rekordår for norsk solkraft, med ei tredobling i løpet av året. Den installerte effekten er no på 149 MW, opp mot berre 45 MW i 2021. Men fortsatt utgjer solkraft ein svært liten andel av krafta i Norge. Ifølge Energikommisjonen som nett leverte arbeidet sitt, bør Norge 33-doble solkrafta i løpet av dei neste sju åra. For at ei utbygging av solkraft skal vere realistisk må kraftselskapa kunne rekne med at kapasiteten til å handsame konsesjonssøknader på dette i NVE er sterk nok.

Terje Aasland (A)

Svar

Terje Aasland: Solkraft i Noreg har fram til no vore prega av å bli montert på bygg der det ikkje er krav om energikonsesjon eller anna sakshandsaming hos NVE. Det synast klart at solkraft framover i større grad vil bli dominert av større bakkemonterte produksjonsanlegg som det er krav om konsesjon for å bygge.
NVE har rapportert at det no kjem inn fleire søknadar om slike anlegg og at desse blir tatt til handsaming fortløpande. Det er med andre ord inga kø i handsaminga av nye solkraftverk. NVE melder samtidig at dette er ein situasjon som kan endre seg i framtida ettersom dei er blitt varsla om fleire store prosjekt. Dermed kan sakshandsamingskapasiteten bli utfordra. Regjeringa har følgd opp dette med å foreslå auka midlar til konsesjonshandsaming i NVE. For 2023 er det ei auke på over 60 mill. kroner for å styrke kapasiteten i NVE og for å digitalisere konsesjonsprosessane. Dette vil vere eit betydeleg bidrag til raskare konsesjonshandsaming framover.
Eg vil i tillegg nemne at solkraftutbygging i stor skala også vil krevje utbygging av nettkapasitet. Pågangen på handsaming av nettsaker er generelt stor. Når det gjeld sakshandsaming av nettsaker så vil eg vise til regjeringa sitt pågåande arbeid med Straumnettutvalget si utgreiing NOU 2022: 6 «Nett i tide – om utvikling av strømnettet», som har som målsetting å få til ei raskare nettutvikling i Noreg. Dette vil også vere viktig for utbygginga av solkraft.