Skriftlig spørsmål fra Lise-May Sæle (H) til samferdselsministeren

Dokument nr. 15:102 (2022-2023)
Innlevert: 13.10.2022
Sendt: 13.10.2022
Rette vedkommende: Kommunal- og distriktsministeren
Besvart: 24.10.2022 av kommunal- og distriktsminister Sigbjørn Gjelsvik

Lise-May Sæle (H)

Spørsmål

Lise-May Sæle (H): Vestland fylkeskommune er eit av fylka med størst etterslep og behov for vedlikehald av fylkesvegar. Ein velfungerande infrastruktur er avgjerande for bu- og arbeidsregionar, men aller viktigast at ein skal ferdast trygt langs vegane.
Meiner statsråden det er fornuftig bruk av fellesskapet sine midlar å bruke totalt 838 millionar kroner på oppslitting av fylkeskommunar framfor å satse på fylkesvegar, og korleis vil statsråden følgje opp etterslepet på fylkesvegane?

Begrunnelse

Det vert brukt fleire hundre millionar på oppslitting av fylkeskommunar, medan fylka parallelt og særleg dei som ikkje har valt å splitte seg opp treng løyvingar til viktige område som til dømes fylkesvegar.

"I forslaget til statsbudsjett har regjeringen bevilget 200 millioner kroner til formålet, men fylkene og Ålesund har anslått kostnadene til totalt 838 millioner kroner," (Dagbladet, 12.10.2022).

Sigbjørn Gjelsvik (Sp)

Svar

Sigbjørn Gjelsvik: Gjennom sine vedtak i 2017, slo Stortinget saman fylkeskommunar som ikkje sjølv ønskte det. Det har difor vore viktig for regjeringa å gi tvangssamanslåtte fylkeskommunar (og kommunar) mogelegheit til å dele seg.
Dei tvangssamanslåtte fylkeskommunane (og Ålesund kommune) vil gjennom ei søknadsordning få kompensert dei direkte delingskostnadane. Kompensasjonen skal vere basert på ei svært nøktern tilnærming til kva som er absolutt nødvendig for å gjennomføre delingsprosessane. Søknadsfristen for dei tre fylkeskommunane og Ålesund er 8. november 2022. Regjeringa har i budsjettforslaget for 2023 foreslått ei løyving på 200 millionar kroner til delingskostnadar. Kommunal- og distriktsdepartementet vil vurdere behov for ytterlegare løyvingar i seinare års budsjett.
Fylkesvegane er eit fylkeskommunalt ansvar, og ansvaret omfattar utgreiing, planlegging, drift, vedlikehald og investeringar. Finansieringa av oppgåvene kjem frå frie inntekter og øyremerkte tilskot, i tillegg til brukarbetaling. Regjeringa foreslår i budsjettforslaget for 2023 om lag 800 mill. kroner til øyremerkte tilskot til fylkesveg over budsjettet til Statens vegvesen. Om lag 400 mill. kroner av dette er retta mot redusert vedlikehaldsetterslep på viktige næringsvegar og veg som utvidar bu- og arbeidsmarknadsregionar, jf. kap. 1320 Statens vegvesen, post 65 Tilskot til fylkesveger. Regjeringa foreslår i budsjettforslaget for 2023 ein vekst i dei frie inntektane til fylkeskommunane på 0,9 mrd. kroner. Samferdselsministeren har for øvrig i år bedt Statens vegvesen om å koordinere ei kartlegging av tilstanden på fylkesvegane saman med fylkeskommunane.