Skriftlig spørsmål fra Kjersti Toppe (Sp) til kommunal- og moderniseringsministeren

Dokument nr. 15:720 (2018-2019)
Innlevert: 11.01.2019
Sendt: 11.01.2019
Besvart: 18.01.2019 av kommunal- og moderniseringsminister Monica Mæland

Kjersti Toppe (Sp)

Spørsmål

Kjersti Toppe (Sp): Vil regjeringa endre forskrifta for Merkurprogrammet slik at fleire nærbutikkar kan søkje om og få støtte, enten ved å endre avstandskravet eller ved at det kan brukast skjønn?

Begrunnelse

Viser til at nærbutikken på Grimo i Ullensvang herad tidlegare har fått støtte av Merkurprogrammet. Men etter forskriftsendringa som kom i vår, er denne butikken hindra i å søkje om støtte fordi den ligg nærare ein annan butikk enn kravet i forskrift på 10 km. Næraste butikk er på Utne, 7 km vekke. Men desse butikkane har heilt ulikt kundegrunnlag, og det er fleire kilometer utan busetnad mellom butikkane. Det er eit klårt ynskje å få endre krav i forskrift til 5 km eller at ein får høve til å bruka skjønn.

Monica Mæland (H)

Svar

Monica Mæland: Merkur har heilt sidan oppstarten tilpassa regelverket til dei økonomiske rammene som Stortinget har sett. I 2017 var det naudsynt å stramme inn praktiseringa av regelverket for å sikre at løyvinga rakk året ut. Det har dei to siste åra vore ei sterk auke i løyvingane til Merkur-programmet. I saldert statsbudsjett i 2017 og i statsbudsjettet for 2018 og 2019 har det kome vesentleg auke i løyvingane. Vi er no i dialog med Merkur-programmet for å få vurdert om det skal gjerast justeringar i regelverket.
Både departementet og styret for Merkur-programmet vurderer jamleg om det er trong for å justere regelverket.
Styret for Merkur-programmet skal diskutere avstands- og omsettingskrav knytt til støtteordningane for daglegvarebutikkar i distrikta på sitt strategimøte i starten av februar i år. Deretter gir styret ei tilråding til Kommunal- og moderniseringsdepartementet. Det er ei klar målsetting at det skal vere best mogleg samsvar mellom løyvingar og regelverk, slik at flest mogleg av butikkane kan få støtte til utvikling og modernisering.
Så fort regelverket eventuelt blir justert, blir butikkdrivarar informerte om dette. Kva konsekvensar dette vil få for butikken i Grimo, er det for tidleg å seie no.