Skriftlig spørsmål fra Kjersti Toppe (Sp) til samferdselsministeren

Dokument nr. 15:684 (2017-2018)
Innlevert: 11.01.2018
Sendt: 12.01.2018
Besvart: 18.01.2018 av samferdselsminister Ketil Solvik-Olsen

Kjersti Toppe (Sp)

Spørsmål

Kjersti Toppe (Sp): Når vil regjeringa bestemme seg for vidare tiltak for ubåten utanfor Fedje, kva hovudtiltak vil bli vald, og kor lang tid vil det ta før det faktiske arbeidet med enten tildekking av båt, eller heving av last før tildekking av båt, kan starte opp?

Begrunnelse

Viser til at Kystverket på sine nettsider skriv at dei ventar på regjeringas vedtak om hovudtiltak og vidare tiltak for ubåten utanfor Fedje. Kystverket har uttalt at dei reknar med at sjøbotn vil vere tilstrekkelig stabil for vidare tiltak ved utgangen av 2017. Statsråden skriv i svar til stortinget (dokument nr.15:131(2017-2018) at regjeringa vil vere sikker på at den støttefyllinga som blei etablert i 2016 har satt seg og fått naudsynt styrke, før dei konkluderer med vidare tiltak. Spørsmålsstillar er undrande til at regjeringa brukar dette som argument for å ikkje gjere vedtak om hovudtiltak. Dette bidreg til store forseinkingar i arbeidet, i og med at ein enno ikkje veit kva hovudtiltak som regjeringa vil velje. Ein har ikkje kunne brukt tida etter støttefyllinga vart etablert til å førebu dei neste tiltaka. Statsråden viser til at det skulle gjerast ei avlesing av konsolideringa av støttefyllinga ved årsskiftet, som vil vise om styrken faktisk er oppnådd og stabil. Det er viktig for befolkninga ved Fedje å få vite om kva framdrift dei kan vente seg at regjeringa vil sikre i denne saka, og kva alternativ regjeringa vil velje.

Ketil Solvik-Olsen (FrP)

Svar

Ketil Solvik-Olsen: Det viktigaste er å sikre ei miljømessig trygg og forsvarleg handtering av kvikksølv-forureininga i og ved vraket av U-864. Det første naudsynte steget i eit forsvarleg arbeid med miljøtiltak, er å etablere ei støttefylling for å sikre den ustabile skråninga under vraket sin baugseksjon. Ei slik støttefylling etablerte vi i 2016.
Som eg informerte om i mitt svar av 2. november 2017 til representanten Kjersti Toppe sitt spørsmål nr. 131 (2017-2018) til skriftleg svar, er det berekna at støttefyllinga og sjøbotnen under fyllinga må setje seg i halvanna år før både fyllinga og sjøbotnen er so sterk at ein kan starte opp vidare arbeid med miljøtiltak ved vraket. I denne saka må vi vere sikre på at støttefyllinga og sjøbotnen under ho har sett seg og fått naudsynt styrke før vi konkluderer om vidare tiltak. Difor er det etablert måleinstrument som registrerer om fyllinga og havbotnen faktisk har sett seg som berekna og er stabil. Den siste planlagde avlesinga av instrumenta og geotekniske vurderingane av datoane er no i januar.
Når vi har måleresultat og vurderingar av disse som viser at fyllinga og sjøbotnen er sterk nok og stabil, vil vi konkludere om vidare tiltak. Regjeringa vil deretter kome tilbake til Stortinget om tiltak og den vidare framdrifta for arbeidet.