Ingrid Fiskaa (SV): Kva for organisasjonar som støttar sanksjonar mot Israel mottar norsk bistand, kva for organisasjonar som arbeider for sanksjonar er utelukka frå å få norsk bistand, og kan eg få svar med lister med namngitte organisasjonar?
Begrunnelse
Regjeringa har vidareført høgreregjeringa si linje med å boikotta sivilsamfunnsorganisasjonar som arbeider for sanksjonar mot Israel. Seinast i budsjettforslaget for 2025 står det under kapittel 159, post 70 Midtøsten:
«Organisasjoner med hovedformål om å boikotte, desinvestere og sanksjonere (BDS) mottar heller ikke norsk bistand.»
Ulike former for boikott, desinvestering og sanksjonar (BDS) mot Israels okkupasjon og folkerettsbrot har brei støtte i sivilsamfunnsorganisasjonar over heile verda. Den globale BDS-rørsla vart starta av det palestinske sivilsamfunnet i 2005, og oppfordrar til ikkjevaldeleg press på Israel inntil landet innfrir dei folkerettslege pliktene sine.
Til Klassekampen 10. oktober uttaler statssekretær Andreas Kravik at formuleringa i statsbudsjettet berre skal gjelda organisasjonar som har BDS som hovudformål, og at palestinske organisasjonar «som for eksempel jobber med kvinners rettigheter, men som også er tilhengere av generell boikott» ikkje er utelukka frå å motta norske bistandspengar.
Det vil derfor vera klargjerande for den vidare debatten at regjeringa legg fram lister over kva for organisasjonar som hamnar i dei to ulike kategoriane.