I proposisjonen legg
Samferdselsdepartementet fram opplegg for forlenging av bompengeinnkrevjinga
i Kristiansandsregionen.
Bakgrunnen for saka
er at Kristiansand kommune ønskjer å forlengje innkrevjinga fram
til tidleg i 2020, eller til den eventuelt blir avløyst av ei ny
bompengepakke for Kristiansandsregionen. Samstundes har lokale styresmakter
slutta seg til endringar i takst- og rabattstrukturen i tråd med
det som er lagt til grunn i Prop. 1 S Tillegg 2 (2015–2016), jf.
Innst. 13 S (2015–2016). Midlane er planlagt nytta til planlegging
av ei ny bompengepakke og grunnerverv. I tillegg er det aktuelt
å prioritere ombygging av E18 Håneskrysset og ulike sykkel- og kollektivtrafikktiltak.
Med bakgrunn i dette
legg Samferdselsdepartementet fram forslag om at dagens innkrevjingsordning
i Kristiansandsregionen blir forlengja med inntil to år. I tillegg
blir takst- og rabattstrukturen justert.
Forslag om forlenging
av innkrevjingsperioden og justering av takst- og rabattstrukturen
for Samferdselspakke for Kristiansandsregionen, fase 1, blei handsama
av aktuelle kommunar og Vest-Agder fylkeskommune i 2016.
Finansieringsopplegget
som har vore til lokalpolitisk behandling, er basert på innkrevjing
av bompengar i ytterlegare to år, i tillegg til fylkeskommunale
og statlege midlar. Samferdselsdepartementet viser til at omfanget
av statlege midlar må vurderast på vanleg måte, og endelege vedtak
blir fatta i dei årlege statsbudsjetta.