Regjeringa gjer i proposisjonen framlegg om
endringar i opplæringslova § 8-1 fjerde ledd og privatskolelova
§ 3-3 første ledd. Etter framlegget skal det gå fram av ordlyden
i lova at ein elev som mobbar, kan flyttast til ein annan skole. Framlegget
er ei presisering av gjeldande rett. Framlegget har vore til høyring
og fekk 70 høyringssvar.
Som bakgrunn for framlegget viser regjeringa
til den politiske plattforma si, Sundvolden-erklæringa, der det
heiter at regjeringa vil «sørge for at det er mobberen som bytter
skole i mobbesaker der skolebytte er eneste løsning». Etter det regelverket
som gjeld i dag, kan ein elev som mobbar, i særlege tilfelle flyttast
til ein annan skole enn den eleven går på. Dette følgjer av opplæringslova
§ 8-1 fjerde ledd og privatskolelova § 3-3 første ledd. Men det
har vore fleire døme på at eleven som blir mobba, har sett seg nøydd
til å byte skole.
At ein elev som mobbar kan flyttast til ein
annan skole, står ikkje eksplisitt i opplæringslova eller privatskolelova,
men det går fram av forarbeida til lovene at det er høve til dette.
For at det skal vere klart at den som mobbar, i visse tilfelle kan flyttast
til ein annan skole, og for å unngå at eleven som blir mobba, blir
nøydd til å byte skole, foreslår departementet at høvet til å flytte
mobbaren går direkte fram av opplæringslova § 8-1 fjerde ledd og
privatskolelova § 3-3 første ledd.
Det går fram av merknadene til framlegga om endringar
i båe lovene at ein elev etter føresegna òg kan flyttast i andre
tilfelle enn ved mobbing. I alle høve gjeld vilkåret om at ein elev
kan flyttast dersom omsynet til dei andre elevane tilseier det.
I båe lovene er det ei presisering om at tiltaket gjeld i særlege
tilfelle. Elles inneheld lovene alt i dag ein føresetnad om at ein
skal ha prøvd andre tiltak.
Regjeringa understreker at framlegget til presisering
ikkje endrar gjeldande rett. Føremålet med presiseringa er at føresegna,
i tråd med gjeldande rett, skal nyttast når det er nødvendig.
Lovframlegga fører verken med seg nye plikter eller
rettar. Framlegget vil derfor ikkje ha økonomiske eller administrative
konsekvensar for kommunane og dei private skolane.