Spørsmål

Ingrid Fiskaa (SV): 36 lokaltogsett skulle vera oppgradert innan utgangen av 2025. Nyleg vart det kjent at Norske tog AS har heva kontrakten om oppgraderinga, og at ingen av togsetta er ferdig oppgradert. Kontrakten vart inngått i 2021, og det må ha vore klart i lang tid at planen ikkje let seg gjennomføra.
Kva er årsaka til dei store forseinkingane, og kva vil regjeringa gjera for å få gjennomført det heilt nødvendige vedlikehaldet på togsetta?

Begrunnelse

Norske tog AS offentleggjorde 22. august at dei i juli avgjorde å heva kontrakten med Alstom om midtlivsoppgradering av 36 lokaltogsett av typen 72. Kontrakten med Alstom vart inngått i 2021, og planen var at alle toga skulle vera ferdig oppgraderte innan utgangen av 2025. Prosjektet er vesentleg forseinka. Alstom har berre tatt imot to togsett for oppgradering, og ingen av dei er ferdigstilt.

Dei aktuelle togsetta blir brukt på lokaltogtrafikk på Jærbanen og på Austlandet. Norske tog AS seier at dei sjølv vil gjennomføra nødvendige oppgraderingar av togsetta, utan å utdjupa dette nærmare.

Svar

Jon-Ivar Nygård: Midtlivsoppgraderinga av Type 72 skulle gje toga ei overhaling innvendig og utvendig. Prosjektets føremål var å gje toga nye dører og gjere det mogleg for passasjerane å lade telefon om bord, blant anna. For å realisere prosjektets mål, var det planlagt ei rekke reparasjonar og tekniske tilpassingar på toga. Det har ikkje lukkast dei involverte partane å finne fungerande løysingar som oppfyller måla. Prosjektet blei forseinka. Utfordringane i prosjektet og forseinkingane har eg vore kjent med, og Stortinget er i dei årlege budsjettproposisjonane orientert om status. Men det var ikkje ynskjeleg å avslutte prosjektet samstundes som det fantes moglegheiter for å finne egna tekniske løysingar. Eg vart 19. juni 2025 gjort kjent med Norske tog ynskja å varsle ei heving av avtala med Alstom.
No når prosjektet er avslutta vil dei involverte partane som eig og brukar toga sjå på kva for vedlikehaldstiltak som vil oppretthalde drifta av toga. Hovudprioritet vil vera sikring av teknisk stabilitet i togas resterande levetid. Norske tog er allereie i gang med oppgraderingar av enkelte deler av interiør, eksteriør og teknisk utstyr. Tiltaka skal gje betre pålitelegheit i drift og ei betre oppleving for dei reisande.