Bakgrunn
Israels brutale krig i Gaza har vara i fire
og ein halv månad og dei sivile lidingane er enorme. Over 30 000 menneske
har mist livet og svært mange er alvorleg skada. Kvar dag sidan
krigen starta den 7. oktober 2023 har det blitt drepne like mange
born som tre skoleklasser. Bustader, sjukehus og skular er lagt
i grus. Skadde og sjuke får ikkje lengre livsviktig helsehjelp.
Med full blokade har Israel nekta befolkninga tilgang på mat. Verdas
matvareprogram rapporterer om svoltkatastrofe.
Alle har rett på eit familieliv og Noreg er
forplikta til å legge til rette for at også menneske som har flykta
til Noreg skal kunne gjenforeinast med næraste familie. Norsk-palestinarar
fryktar at dei aldri meir skal få sjå familiemedlemmer som bur i
Gaza. Personar i Noreg kan endeleg no levere inn søknad om gjenforeining
på vegne av familiemedlem som finn seg i Gaza. Det er ei stor forbetring,
då det har vore heilt umogleg for folk i Gaza å kome seg til dei
kontora dei i utgangspunktet var forplikta til å møte opp på. Men
utan hjelp til evakuering frå Gaza er fortsett ikkje retten til
familiegjenforeining reell. Med stengte grenser er det umogleg for
menneske å kome seg ut av Gaza. For at retten til familiegjenforeining
skal bli reell er det derfor grunnleggande at norske styresmakter bistår
med evakuering. Evakuering er krevjande, men ikkje umogleg. Norske
styresmakter klarte å få ut dei fleste nordmenn som fant seg i Gaza
då krigen braut ut.
Svært mange born har blitt foreldrelause i Gaza
som følgje av den nådelause krigen. Også born som har tanter og
onklar i Noreg. Ved å utvide familiegjenforeiningsreglane til også
å omfatte born i nær familie, vil born som har mist alt kunne få
ei trygg framtid i Noreg ilag med slekt.