Andre visepresident Nils T. Bjørke [10:02:40 ] : Presidentskapet
legg med dette fram Innst. 210 S for 2023–2024, om regulering av
løna for medlemene av Høgsterett. Tilrådinga er samrøystes. Løna
til Høgsterett vert fastsett årleg av Stortinget, med verknad frå
1. oktober året før.
Etter at løna til
domarane i Høgsterett vart løfta monaleg i 2007, har Stortinget
lagt til grunn at lønsutviklinga for høgsterettsdomarar bør følgja
nivået og lønsutviklinga i det øvre sjiktet av statlege leiarløningar.
Regulering av løna
til domarane i Høgsterett har vorte fastsett med utgangspunkt i
den faktiske lønsutviklinga for leiarane i statens leiarlønssystem
og lønsutviklinga for domarane i tingrettane og lagmannsrettane. Det
har òg vore sett til den generelle lønsutviklinga i privat og offentleg
sektor og oppgjeret for stortingsrepresentantane og medlemene av
regjeringa.
Presidentskapet
føreslår no ei mindre og generell praksisendring, som Høgsterett
sjølv har føreslege overfor Stortingets presidentskap. Endringa
inneber at det vert teke utgangspunkt i lønsutviklinga for det året
lønsfastsetjinga gjeld, og ikkje i lønsutviklinga for det føregåande
året. For lønsfastsetjinga som vert vedteken av Stortinget i 2024
– med verknad frå 1. oktober 2023 – inneber forslaget at det vert
teke utgangspunkt i lønsutviklinga i 2023 i staden for i lønsutviklinga
i 2022.
Presidentskapet
viser til at fastsetjinga av løna for medlemene av Høgsterett har
ei side til kravet om uavhengige domstolar, som følgjer av Grunnlova,
menneskerettslova og internasjonale konvensjonar Noreg er bundne
av. Dette tilseier at lønsfastsetjinga byggjer på føreseielege og
objektive kriterium og ein tryggjande avgjerdsprosess som varetek
at fastsetjinga skjer i samsvar med desse kriteria. Presidentskapet
har difor i tilrådinga lista opp dei sentrale kriteria og momenta
for fastsetjing av løna til medlemene av Høgsterett.
Eg viser elles
til merknadene og anbefaler tilrådinga frå eit samrøystes presidentskap.
Frå 1. oktober vert løna fastsett slik: