Søk

Innhold

Merknad

Klikk HER for vedlegg i pdf

1. Samandrag

I meldinga gjer regjeringa greie for villreinen sitt opphav i landet, historie og økologi knytt til norsk villrein. Det blir gjort greie for villreinen si rolle for næringsliv, friluftsliv, kultur og forvaltning av natur i eit breitt perspektiv.

I meldinga blir det peika på at villrein er ein nøkkel-art, ein art som er spesielt viktig for økosystemet. Tar vi vare på villreinen, tar vi også vare på store område med natur og ei lang rekkje artar i Noreg.

Norsk forvaltning av villrein og leveområda til villreinen omfattar oppfølging av ei rekkje internasjonale avtalar, nasjonale lover og retningslinjer, som kvar for seg påverkar bevaringa og bruken av villreinfjellet.

FNs berekraftsmål og internasjonale konvensjonar som biomangfaldkonvensjonen og Bernkonvensjonen har direkte betydning for villreinforvaltninga i Noreg, med fokus på bevaring av naturmangfald og økosystem. På det nasjonale nivået skal plan- og bygningslova, naturmangfaldlova og viltlova sikre at villreinen og leveområda til villreinen blir forvalta berekraftig. Samtidig skal ivaretaking av leveområda til villreinen også vegast opp mot andre viktige samfunnsinteresser.

Ein finn nesten 90 pst. av vill, europeisk fjellrein i Noreg, noko som gjer villreinen til ein norsk ansvarsart. I meldinga blir det framheva at det betyr at Noreg har eit særleg internasjonalt ansvar for å ta vare på denne arten.

Det er mykje kunnskap om villrein og leveområda til villreinen i Noreg, både frå utgreiingar, FoU-arbeid og overvaking. Denne kunnskapen viser at den samla belastninga på villrein i dag er for stor, og at det er mange ulike påverknader som bidrar til dette.

Vidare blir det i meldinga gjort greie for villreinen sine leveområde, og korleis vilkåra for villreinen har endra seg.

Det blir òg gjort greie for villreinen si helse og korleis sjukdommar, parasittar, overbeite og klimaendringar vil kunne skape endå fleire utfordringar for villrein i framtida.

Det blir gjort greie for kva for tiltak som er sett i verk i Noreg for å bevare villreinen, og for kvalitetsnorma for villrein.

I meldinga hevdar regjeringa at utan nye og sterkare tiltak er det ikkje mogleg å nå desse måla. Regjeringa fremjar ein ny politikk innan fem strategiske område som skal bidra til å løyse dei komplekse utfordringane i villreinfjellet. Dei fem strategiske områda er:

  • 1. heilskapleg og restriktiv arealforvaltning i villreinfjellet

  • 2. auka tilrettelegging av villreinvennleg ferdsel

  • 3. betre villreinhelse

  • 4. meir berekraftig bestandsforvaltning av villrein

  • 5. målretta restaurering av leveområda til villreinen

I meldinga blir det gjort greie for forslag til tiltak på fleire nivå.

Regjeringa skriv i meldinga at dei har som mål å over tid oppretthalde minst det leveområdet villreinen har i dag. For å styrkje kunnskapen om leveområda til villreinen og endringar i arealbruk og økosystemtenester skal regjeringa lage ein tematisk naturrekneskap for villrein.

Gjennom tiltaka som blir foreslått i denne meldinga, syner regjeringa til at dei ti nasjonale villreinområda er vurdert å kunne inngå i Noreg sitt bidrag til å nå det globale målet om minst 30 pst. bevaring av natur, og syner i den samanheng til den komande naturmeldinga.

Det blir peika på at staten har det overordna ansvaret for planlegginga etter plan- og bygningslova, og at staten gir føringar for den regionale og kommunale planlegginga gjennom lover, føresegner og retningslinjer.

Det blir gjort greie for praksisen for konsesjonar for etablering og drift av ulike typar næring i villreinområde.

Det blir òg gjort greie for korleis planar på ulikt nivå (regulerings-, kommunale og regionale planar) kan ha konsekvensar for villreinen og korleis arealforvaltninga kan handterast for å ta vare på villreinen.

Andre tema som blir diskutert i meldinga er mellom anna jakt, rovvilt, ferdsel med motorisert køyretøy, beitebruk, etablering av næring og transportårer, villrein-fondet og forsking.

Framgangen i gjennomføringa av stortingsmeldinga og tiltaksplanane etter kvalitetsnorma for villrein skal bli evaluert. Dersom det er sannsynleg at måla i denne meldinga om tilstanden til villreinen ikkje vil bli nådde, vil regjeringa igjen vurdere nye eller forsterka tiltak og verkemiddel på tvers av alle aktuelle sektorar, slik at måla likevel kan bli nådde.

Neste kapittel