Endringar i statsbudsjettet 2016

Kap. 1811 Statoil ASA

Post 96 Aksjar

Styret i Statoil har etter generalforsamlingsvedtak 11. mai 2016 innført eit utbytteaksjeprogram, som er innretta slik at aksjeeigarar kan velje å ta imot utbyttet heilt eller delvis i form av kontantar eller nye aksjar i selskapet til rabattert pris. Statens kontantutbytte vil bli redusert i perioden då utbytteaksjeprogrammet pågår, og talet på aksjar som staten har i Statoil vil auke sjølv om eigardelen blir halden konstant, jf. Prop. 84 S (2015–2016) Deltakelse i utbytteaksjeprogram og kapitalforhøyelse i Statoil ASA. For nærare informasjon om programmet og Stortingets behandling av denne, jf. Innst. 260 S (2015–2016).

Den delen av utbyttet som blir nytta til å utferde nye aksjar for staten er føreslått inntektsført under kap. 4811 Statoil ASA, post 96 Utbytteaksjar og utgiftsført under kap. 1811 post 96. Dermed vil staten sin del av utbyttet som blir nytta til å utferde nye aksjar, bli synleggjort og inntektsført som utbytte og samtidig utgiftsført som aksjekjøp i statsrekneskapen slik at aksjekapitalen i Statoil ASA blir auka tilsvarande i statens kapitalrekneskap, bokført verdi.

Det blir foreslått løyvd 4 989 mill. kroner i utbytteaksjar i 2016. Ein viser til tilsvarande forslag til løyving under kap. 4811, post 96 Utbytteaksjar.

Kap. 1820 Noregs vassdrags- og energidirektorat

Post 21 Spesielle driftsutgifter, kan overførast

Det blir foreslått å auke løyvinga med 12 mill. kroner, til om lag 104 mill. kroner. Ein viser til motsvarande inntektsauke under kap. 4820, post 2 Oppdrags- og samarbeidsinntekter.

Post 22 Flaum- og skredførebygging, kan overførast, kan nyttast under postane 60 og 72

Det er anslått at ein større del av løyvinga til flaum- og skredtiltak vil bli gitt som tilskot til kommunar enn tidlegare budsjettert.

Det blir foreslått å redusere løyvinga med 33 mill. kroner, til om lag 338 mill. kroner. Ein viser til motsvarande utgiftsauke under kap. 1820, post 60 Tilskot til flaum- og skredførebygging.

Post 60 Tilskot til flaum- og skredførebygging, kan overførast, kan nyttast under postane 22 og 72

Det blir foreslått å auke løyvinga med 33 mill. kroner, til 68 mill. kroner. Ein viser til omtale av motsvarande utgiftsreduksjon under kap. 1820, post 22 Flaum- og skredførebygging.

Kap. 2440/5440 Statens direkte økonomiske engasjement i petroleumsverksemda

Løyvinga under kap. 2440, post 30 Investeringar blir foreslått redusert med 2 000 mill. kroner, til 28 000 mill. kroner.

Endringane i underpostar omtala i proposisjonen fører til at det berekna driftsresultatet for SDØE er auka med 1 500 mill. kroner, til 63 500 mill. kroner.

Overslaget for netto konstantstraum frå SDØE er auka frå 59 500 mill. kroner til 62 900 mill. kroner, ein auke på 3 400 mill. kroner frå gjeldande løyving for 2016.

Kap. 4811 Statoil ASA

Post 96 Utbytteaksjar

Det blir foreslått løyvd 4 989 mill. kroner i utbytteaksjar i 2016. Ein viser til omtale og tilsvarande utgiftsauke under kap. 1811, post 96 Aksjar.

Kap. 4820 Noregs vassdrags- og energidirektorat

Post 2 Oppdrags- og samarbeidsinntekter

Det blir foreslått å redusere løyvinga med 12 mill. kroner, til om lag 101 mill. kroner. Ein viser til omtale og tilsvarande utgiftsauke under kap. 1820, post 21 Spesielle driftsutgifter.

Kap. 5685 Aksjar i Statoil ASA

Post 85 Utbytte

For budsjettformål er lagt til grunn eit kontantutbytte tilsvarande utbetalinga for første kvartal 2016 også for andre kvartal 2016. Det er dermed budsjettert med eit samla kontantutbytte på 10 770 mill. kroner, ein reduksjon på 4 612 mill. kroner.

Statleg deltaking i Dvalin

Dvalin er eit gassfelt i utvinningsløyve 435 i Norskehavet. Estimerte utvinnbare reservar er av operatøren anslått til rundt 18,2 mrd. standard kubikkmeter gass og 0,4 mill. standard kubikkmeter kondensat. Venta produksjonsstart for Dvalin er fjerde kvartal 2020. Rettshavarane i løyvet må tiltre PUD seinast 3. januar 2017. På dette tidspunktet må den endelege eigarsamansetjinga i løyvet vere avklart.

Petoro har blitt kontakta av rettshavarar i utvinningsløyvet med tanke på ei mogleg statleg deltaking i Dvalin, og Petoro har gjort ei vurdering av tekniske og økonomiske sider ved Dvalin-utbygginga. Petoros vurdering er at utbygging av Dvalin-feltet samla sett vil vere lønsamt for SDØE.

Olje- og energidepartementet har fullmakt til å godkjenne overdraging (sal, kjøp eller byte) av deltakardelar for Petoro AS som forvaltar av SDØE der ein går ut frå at ressursane for deltakardelen i utvinningsløyvet på tidspunktet for overdraginga er mindre enn 3 mill. Sm3 oljeekvivalentar, jf. vedtak XIV i Prop. 1 S (2015–2016) og Innst. 9 S (2015–2016).

Basert på Petoros vurdering er reserveanslaget for OMV sin del på 20 pst. i løyvet innanfor fullmaktsgrensa. Dersom reserveanslag til operatøren for Dvalin blir lagt til grunn, er anslaget for OMV sin del 3,72 mill. Sm3 oljeekvivalentar.

Vidare har departementet godkjent at staten ved Petoro kan overta 10 prosentpoeng av Maersk sin del, i og med at selskapet har sagt at det ikkje vil tiltre PUD og vil tre ut av løyvet. OED har fullmakt til å godkjenne at Petoro kan delta i overdraging (sal, kjøp, byte) av deltakardelar i interessentskap der ein rettshavar vel å tre ut av interessentskapet og der overdraginga vedkjem SDØE, jf. vedtak XV i Prop. 1 S (2015–2016) og Innst. 9 S (2015–2016).

Det er løyvingsdekning for budsjettkonsekvensane av ovannemnde overdragingar for SDØE under kap. 2440/5440.

Det vil bli fleire overdragingar av deltakardelar til SDØE i utvinningsløyve 435. Petoro og operatøren har ulik vurdering av reservane i Dvalin. På den bakgrunnen legg departementet saka fram for Stortinget, jf. forslag til vedtak II.

Martin Linge

Departementet viser til at i etterkant av framlegginga av Prop. 1 S (2016–2017) har operatøren av Martin Linge-prosjektet informert departementet om ein ytterlegare auke i investeringsanslaget for prosjektet på om lag 3 mrd. kroner sidan førre rapportering. Anslaget for samla investeringar er no 38,6 mrd. kroner, som samanlikna med PUD-anslaget er ein total auke på 10,4 mrd. kroner, der 2,15 mrd. kroner er valutaendringar. Hovudårsaken til auken sidan 2015 er utsett produksjonsoppstart med eitt år til andre kvartal 2018, som følgje av forseinka detaljprosjektering av plattformoverbygget.

Bruk av fullmakter under petroleumsverksemda

Som ein del av den årlege behandlinga av statsbudsjettet gir Stortinget fullmakter til Kongen i statsråd og Olje- og energidepartementet knytte til petroleumsverksemda. Dette gjelder:

• Fullmakt XII – Utbyggingsprosjekt på norsk kontinentalsokkel

  • Gullfaks

  • Oseberg Vestflanken 2

• Fullmakt XIII – Overføring av eigedomsrett mot bruksrett

  • Prosjekt for oppgradering av kapasiteten i Kvitebjørn gassrøyr

• Fullmakt XV – Overføring og samordning av eigardelar i utvinningsløyve

  • Byrding

Olje- og energidepartementet gav 15. november 2016 samtykke til at Petoro kan delta i forenkla samordning i samsvar med fullmakt XV, pkt. 2 i Prop. 1 S (2015–2016).