I Meld. St. 26 (2012–2013) Nasjonal transportplan
2014–2023 er det lagt til grunn ei trinnvis utbygging og utbetring
av E6 på Helgeland. Utbygginga er føresett delfinansiert med bompengar.
Prosjektet er ei samla utbyggingspakke som var føresett gjennomført
i tre delar: E6 Helgeland nord, Helgeland sør og Brattåsen–Lien. Stortinget
slutta seg til utbyggings- og finansieringsopplegg for første utbyggingsetappe
gjennom handsaminga av Prop. 55 S (2013–2014) Utbygging og finansiering
av E6 på strekninga Korgen–Bolna i Hemnes og Rana kommunar (E6 Helgeland
nord) i Nordland, jf. Innst. 178 S (2013–2014).
Samferdselsdepartementet legg i denne proposisjonen
fram forslag om utbygging og finansiering av dei to siste delane
av utbygginga, dvs. utbygging av strekninga mellom Nord-Trøndelag
grense og Korgen, inkl. prosjektet Brattåsen–Lien. Utbygginga er
planlagt starta opp hausten 2016.
E6 mellom Nord-Trøndelag grense og Osen er om
lag 137 km lang, jf. fig. 2.1 i proposisjonen. Årsdøgntrafikken
(ÅDT) varierer frå 800 køyretøy til 3 800 køyretøy. Tungtrafikken
utgjer mellom 14 og 16 pst. av trafikken. I perioden 2005–2014 var
det i alt 142 ulykker med personskade på denne strekninga. Av desse
blei 9 personar drepne, 16 hardt skadde og 180 lettare skadde.
Det er lagt opp til å byggje ut til saman om
lag 80 km veg, fordelt på 9 delstrekningar. Som for E6 Helgeland
nord vil utbygginga av 7 av delstrekningane bli lyst ut i ein samla
konkurranse der same entreprenør vil stå for utbygging samt drift og
vedlikehald i ein periode på inntil 15 år.
For utbygging av delstrekningane Kapskarmo–Brattåsen
og Brattåsen–Lien vil det bli nytta tradisjonelle konkurranseformer,
der drift og vedlikehald ikkje inngår. Her skal E6 leggjast i ny trasé
vest for tettstadene Trofors og Grane over ei strekning på om lag
22 km. Det skal mellom anna byggjast ein tunnel og to bruer for
kryssing av Vefsna og Svenningdalselva. I tillegg inngår ombygging
av lokalt vegnett.
Det er gjennomført ekstern kvalitetssikring (KS2)
av prosjektet. Samferdselsdepartementet legg til grunn ei styringsramme
på 3 860 mill. 2014-kroner og ei kostnadsramme på 4 290 mill. 2014-kroner.
Rekna om til 2015-prisnivå blir styringsramma 3 970 mill. kroner
og kostnadsramma 4 410 mill. kroner.
Samfunnsøkonomisk netto nytte for utbygginga er
rekna til om lag ‑1 240 mill. kroner. Netto nytte over totale kostnader
er rekna til ‑0,4.
Opplegget for samla utbygging og delvis bompengefinansiering
av E6 Helgeland blei handsama av kommunale styresmakter og Nordland
fylkeskommune våren 2010.
Spørsmålet om garanti for E6 Helgeland sør blei handsama
av Nordland fylkeskommune i møte i fylkestinget 20. april 2015.
Det er ein føresetnad at Fylkesmannen i Nordland godkjenner dei kommunale
garantiane og at Kommunal- og moderniseringsdepartementet godkjenner
den fylkeskommunale garantien.
Vefsn kommune har vedteke å stille ein garanti på
71 mill. kroner, Rana kommune ein garanti på 136 mill. kroner og
Grane kommune ein garanti på 8 mill. kroner, til saman 215 mill.
kroner.
Finansieringsplanen for utbygging av E6 Helgeland
sør omfattar statlege midlar og bompengar. Den statlege delen utgjer
86,9 pst. av kostnadene. Forslag til finansieringsplan er vist i
tabellen under.
Finansieringsplan for Helgeland
sør
| | | Mill. 2015-kr |
| 2014–2017 | 2018–2023 | Sum |
Statlege midlar | 860 | 2 590 | 3 450 |
– Store prosjekt | 460 | 1 720 | 2 180 |
– Programområda | 70 | 200 | 270 |
– Fornying | 330 | 670 | 1 000 |
Bompengar | 340 | 180 | 520 |
Sum | 1 200 | 2 770 | 3 970 |
Finansieringsopplegget byggjer på tovegs, parallell-
og etterskottsinnkrevjing i tre automatiske bomstasjonssnitt mellom
Nord-Trøndelag grense og Korgen. Innkrevjinga er planlagt starta opp
i 2016.
Det er lagt til grunn at tunge køyretøy (totalvekt over
3 500 kg) skal betale tredobbel takst. Samla takst er rekna til
85 kroner for lette køyretøy og 255 kroner for tunge køyretøy som
køyrer heile strekninga.
Basert på føresetnadene i denne proposisjonen
er brutto bompengeinntekter rekna til om lag 920 mill. kroner, fordelt
med 520 mill. kroner til investeringar, 230 mill. kroner til å dekkje
finansieringskostnader og 170 mill. kroner til å dekkje innkrevjingskostnader
og kostnader ved drift av bompengeselskapet.
Ved utgangen av 2015 er det venta eit forbruk
på prosjektet på om lag 120 mill. kroner. Dette er inkludert forbruk
frå tidlegare år som er stilt til disposisjon gjennom mellombels
omdisponering av statlege midlar innafor Statens vegvesen sine fullmakter.
Det er derfor føresett at bompengeselskapet stiller til disposisjon
om lag 120 mill. kroner i 2015.
Trafikkføresetnadene går fram av kapittel 4
i proposisjonen.
Bompengeopplegget i denne proposisjonen og Prop.
55 S (2013–2014) er basert på ein føresetnad om 6,5 pst. lånerente.
Dette er i tråd med dei lokalpolitiske vedtaka. Gjennom Prop. 119
S (2013–2014) er det opna for at den reknetekniske renta i ein overgangsperiode
kan setjast lågare, i intervallet mellom 6,5 pst. og renta på 10-års
statsobligasjonslån. Det er ein føresetnad at det er lokal tilslutning
til dette og at dei kommunale og fylkeskommunale garantiane blir
oppretthaldne. Vidare er det ein føresetnad at lokale styresmakter
forpliktar seg til å leggje prosjektet inn i eit av dei nye bompengeselskapa når
desse er etablerte. Samferdselsdepartementet ber Stortinget om fullmakt
til at det kan fastsetjast takstar på bakgrunn av desse føresetnadene.
Etter at Stortinget har fatta vedtak om utbygging og
finansiering av E6 Helgeland sør i Nordland, vil det bli inngått
avtale mellom Statens vegvesen Vegdirektoratet og bompengeselskapet
i tråd med gjeldande standardavtale og dei føresetnadene som er
lagt til grunn i proposisjonen.