Auka internasjonalisering inneber mellom anna at
talet på internasjonale familiar med barn aukar. I nokre av desse
familiane vert konfliktane så store at ein av foreldra tek med seg
barnet eller barna til utlandet, oftast til heimlandet sitt. Det
er etablert internasjonale avtalar som skal sikre at barn som er
bortførte skal førast tilbake til landet dei budde i før bortføringa,
og at konfliktar mellom foreldra med omsyn til barnet sin bustad
vert løyste i rettsapparatet i dette landet. Det internasjonale
samarbeidet om barnebortføring har i praksis vist seg ikkje å vere
nok til å sikre at alle saker om barnebortføring løyser seg innan rimeleg
tid. Slike saker er stadig framme i media, og situasjonen kan vere
særs vanskeleg for barna og foreldra. Det er difor behov for nye
tiltak som kan bidra til løysing.
I proposisjonen legg Arbeids- og sosialdepartementet
fram forslag til ei ny lov om stans i utbetalinga av offentlege
ytingar og barnebidrag når ein av foreldra har bortført eit barn
til utlandet. Som barnebortføring reknar ein tilfella der ein av
foreldra tek med seg eit barn som bur i Noreg til eit anna land
i strid med foreldreansvaret, eller eventuelt held tilbake barnet
i eit anna land etter eit lovleg opphald der.
Etter reglane i dag har barnebortføring i seg
sjølv ikkje noko å seie for utbetalinga av offentlege ytingar eller
innkrevjing og utbetaling av barnebidrag. Utbetaling av ytingar
og bidrag til den av foreldra som har teke med seg barn til utlandet
i strid med foreldreansvaret, vert ofte opplevd som offentleg finansiering
og legitimering av den ulovlege handlinga.
Opphald i utlandet kan likevel føre med seg
at vilkåra for ei yting ikkje lenger er oppfylte. Den nye lova tek
sikte på å sikre ei rask vurdering av retten til ytingar etter ei
bortføring til utlandet, slik at ytingar vert stansa så snart som
mogleg når vilkåra ikkje er oppfylte.
Etter lova skal ein ved barnebortføring også
halde tilbake barnebidrag og ytingar som ein elles har rett til
i utlandet når dette ikkje kan reknast som eit uforholdsmessig inngrep
i den konkrete situasjonen.
Lovforslaget svarar i det vesentlege til forslaget i
Prop. 200 L (2012–2013), som vart lagt fram av regjeringa Stoltenberg
II. Regjeringa trekte denne proposisjonen tilbake for å vurdere
om ein kunne få med andre tiltak som kan fremje tilbakeføringa av
barn som vert bortførte, mellom anna om ein kunne ta beslag i bortføraren
si formue i Noreg. Justis- og beredskapsdepartementet vil vurdere
om det er tilstrekkeleg grunn til å utgreie slike beslag. Saka reiser
vanskelege spørsmål, og ei utgreiing vil venteleg ta tid. Ein bør
ikkje vente med gjennomføringa av reglane om å halde tilbake ytingar
og barnebidrag i bortføringssakene, og proposisjonen vert difor
lagt fram på nytt. Departementet vil vurdere nye tiltak på bakgrunn
av erfaringane i praksis.
Formålet med lova er å fremje rask tilbakeføring av
barn som er bortført til utlandet av ein av foreldra og førebyggje
slik bortføring. Lova gjev også generelle reglar om utbetaling av
offentlege ytingar og innkrevjing av barnebidrag etter at eit barn
er bortført.
Etter forslaget gjeld lova saker med bortføring frå
Noreg til utlandet som vert rekna som bortføringssaker etter Haag-konvensjonen
frå 1980 om dei sivile sidene ved internasjonal barnebortføring
eller Europarådskonvensjonen frå 1980 om godkjenning og fullbyrding
av avgjerder om foreldreansvar og om gjenoppretting av foreldreansvar.
Saker som involverer land som ikkje er med i konvensjonane, skal
reknast som bortføringssaker når politiet har registrert barnet
som sakna eller har oppretta straffesak. Som barn vert rekna personar
som ikkje har fylt 16 år.
Offentlege ytingar er i forslaget til § 3 definerte som
ytingar som vert administrerte av arbeids- og velferdsforvaltninga
og Husbanken, medan barnebidrag vert avgrensa til barnebidrag som vert
kravd inn av arbeids- og velferdsetatens innkrevjingssentral.
Etter lovforslaget skal det gå meldingar til
arbeids- og velferdsforvaltninga og til Husbanken om barnebortføringar
som går inn under lova. Dette skal sikre ei rask vurdering av retten
til ytingar etter ei bortføring til utlandet, slik at ytingane kan
bli stansa så snart råd er når vilkåra for utbetaling i utlandet
ikkje er oppfylte. Det vert også presisert at det ikkje skal skje
endringar i innkrevjinga av barnebidrag på grunn av ei barnebortføring,
jf. lovforslaget §§ 4 til 6.
Etter lovforslaget § 7 skal ein også halde tilbake ytingar
og barnebidrag når dette kan fremje tilbakeføring av barnet, men
ein skal ta med i vurderinga risikoen for at barnet og bortføraren vert
påført skade. Det skal ikkje treffast avgjerd om å halde tilbake
ytingar eller barnebidrag dersom dette må reknast å vere for inngripande
ut frå den konkrete situasjonen.
Lovforslaget §§ 8 og 9 gjev heimel for innhenting
av opplysningar i saker om å halde tilbake ytingar og barnebidrag
og opnar for å be om ei vurdering frå ein sakkunnig før det vert
gjort vedtak.
Spørsmålet om å halde tilbake eller ikkje halde tilbake
ytingar og barnebidrag skal vurderast på nytt dersom nye opplysningar
eller endringar i dei faktiske tilhøva talar for det, og i alle
tilfelle skal ei sak vurderast på nytt når det er gått to år etter
bortføringa utan at saka er løyst (§ 10).
Pengar som er haldne tilbake etter lova, skal
stå på sperra og renteberande konto og utbetalast når saka er løyst,
til dømes ved tilbakeføring av barnet. Offentlege ytingar skal i
alle høve utbetalast når barnet fyller 16 år, dvs. den same aldersgrensa
som for tiltak i bortføringssaker etter Haag-konvensjonen frå 1980.
Barnebidrag på sperra konto skal utbetalast til barnet når barnet
fyller 18 år. Desse reglane går fram av lovforslaget § 11.
Lovforslaget § 12 har reglar om ytingar og barnebidrag
til den attverande av foreldra. Ein skal etter forslaget halde fram
med desse utbetalingane i inntil 6 månader etter bortføringa, men
i inntil 12 månader dersom den attverande framleis har utgifter
knytte til omsorga for barnet, eller dersom andre særlege grunnar
gjer det rimeleg. Ytingar vil i dette tilfellet seie ytingar som
vert utbetalte til den attverande som representant for barnet eller
som den attverande får på grunn av omsorga for barnet.
I lovforslaget § 13 vert det presisert at lova
også gjeld for saker der ein av foreldra eller begge har bortført
eit barn som barnevernet har teke over omsorga for. Tiltak etter
lova vil i slike tilfelle kunne nyttast mot begge foreldra.
Lovforslaget § 14 gjev reglar om handsaminga av
saker om å halde tilbake ytingar og barnebidrag. Forvaltningslova
skal gjelde, med dei presiseringane og særreglane som går fram av paragrafen.
Når det gjeld handsaming av andre saker etter
lova, til dømes spørsmålet om stans i ytingar etter lovforslaget
§ 5 av di bortføraren og barnet er i utlandet, skal dei vanlege
reglane for dei einskilde ytingane gjelde. Tilsvarande gjeld for
innkrevjing av barnebidrag. Dette vert slege fast i dei aktuelle
paragrafane.
Etter lovforslaget § 16 tek lova til å gjelde
frå den tid Kongen fastset. Lova skal også omfatte saker der bortføringa
skjedde før lova tok til å gjelde, likevel slik at ytingar og barnebidrag
for tidsrom før lova tok til å gjelde, ikkje kan haldast tilbake
med heimel i lova.
Forslaget til ny lov vil kunne føre til at ytingar som
vert utbetalte i saker med barnebortføring frå Noreg til utlandet,
vert stansa på et tidlegare tidspunkt enn i dag (av di det raskt
vil gå melding til arbeids- og velferdsetaten om at det har skjedd ei
barnebortføring til utlandet). Dette vil særleg kunne dreie seg
om barnetrygd, bidragsforskott, bustøtte og ytingar frå folketrygda
til einslege forsørgjarar. Det er likevel så få slike barnebortføringar
per år at det ikkje er grunnlag for å justere dei ulike stønadsbudsjetta.
Den nye ordninga med å halde tilbake offentlege ytingar
og barnebidrag vil i seg sjølv ikkje påverke stønadsbudsjetta, ettersom
det dreier seg om å halde tilbake ytingar som i alle tilfelle skulle
ha vore utbetalte. Endringa går berre ut på at ytingane ikkje lenger
skal bli utbetalte til bortføraren, men mellombels skal gå inn på
ein sperra konto.
Forslaget om å kunne halde tilbake offentlege
ytingar og barnebidrag vil føre til administrativt meirarbeid i
høve til i dag for dei ulike instansane som er involverte i handsaminga
av saker etter den nye lova.
Det vert vist til proposisjonen for ein gjennomgang
av desse konsekvensane.
Departementet legg til grunn at dei totale kostnadene
ved innføringa av den nye ordninga ikkje gjer det naudsynt å endre
dei gjeldande budsjettrammene.
I høyringsnotatet peika departementet på behovet
for å følgje med på konsekvensane av å innføre ei ordning med tilbakehald
av offentlege ytingar og barnebidrag ved barnebortføring.
Departementet er samd i at det er behov for
å evaluere ordninga. Ordninga med å halde tilbake offentlege ytingar
og barnebidrag tek sikte på å fremje tilbakeføring av barnet i bortføringssaker, og
effekten med omsyn til dette blir eit hovudpunkt ved evalueringa.
Dersom tilbakeføring av barnet skjer relativt kort
tid etter at ein set i verk åtgjerda, vil dette kunne tolkast som
ein indikasjon på at tiltaket har effekt. Det er likevel fleire
tiltak som kan vere i bruk og få verknad samtidig. Til dømes vil Justis-
og beredskapsdepartementet sende ein søknad etter Haag-konvensjonen
frå 1980 til landet der barnet oppheld seg for å be om assistanse, den
attverande av foreldra kan melde barnet sakna hos politiet eller
starte straffesak. Ved bortføringssaker til eit ikkje-konvensjonsland
vil diplomatiske midlar bli tekne i bruk. Det kan difor vere vanskeleg
å konkludere med omsyn til årsaka til at ein bortførar vel å returnere
med barnet. Det vil også vere viktig å konstatere eventuelle uheldige
sider ved ordninga.
Ein eventuell førebyggjande effekt vil ein kunne sjå
dersom talet på bortføringssaker går ned etter at ein byrjar med
å halde tilbake ytingar og barnebidrag. Det kan også vere aktuelt
å få kunnskap om effekten av ordninga ved å sende spørjeskjema til
partane etter at tiltaket har vore nytta i deira tilfelle.
Departementet vil sørgje for at ordninga med
å halde tilbake ytingar og barnebidrag ved barnebortføring vert
evaluert på eigna vis. Dette bør skje tidlegast etter at ordninga
har vore i kraft i tre år.
Komiteen, medlemene frå Arbeidarpartiet,
Gunn Elin Flakne, Kari Henriksen, leiaren Hadia Tajik og Lene Vågslid,
frå Høgre, Margunn Ebbesen, Hårek Elvenes, Peter Christian Frølich og
Anders B. Werp, frå Framstegspartiet, Jan Arild Ellingsen og Ulf
Leirstein, frå Kristeleg Folkeparti, Kjell Ingolf Ropstad, og frå
Senterpartiet, Jenny Klinge, vil understreke viktigheita
av at det er eit internasjonalt mål å hindre barnebortføring, og
leggje til rette for at bortførte barn kjem tilbake til landet der
barnet er busett.
Komiteen vil vise til at proposisjonen
inneheld forslag til ei ny lov om stans i utbetalinga av offentlege
ytingar og barnebidrag når ein av foreldra har bortført eit barn
til utlandet. Komiteen vil vidare vise til at ein
reknar barnebortføring som tilfella der ein av foreldra tek med
seg eit barn som bur i Noreg til eit anna land i strid med foreldreansvaret,
eller eventuelt held tilbake barnet i eit anna land etter lovleg
opphald der.
Komiteen vil vise til at formålet
med lova er å fremje rask tilbakeføring av barn som er bortført til
utlandet av ein av foreldra og førebyggje slik bortføring, og viser
til lovforslaget § 1. Komiteen merkar seg at lova
også gjev generelle reglar om utbetaling av offentlege ytingar og innkrevjing
av barnebidrag når eit barn er bortført.
Komiteen merkar seg at lovforslaget
svarar i det vesentlege til forslaget i Prop. 200 L (2012–2013),
som vart lagt fram av regjeringa Stoltenberg II.
Komiteens medlemmer fra Høyre
og Fremskrittspartiet viser til at regjeringen trakk denne
proposisjonen for å vurdere om andre tiltak, blant annet muligheten
til å ta beslag i bortførerens formue i Norge som kan fremme tilbakeføring
av barn, kunne inkluderes i et nytt lovforslag. Justis- og beredskapsdepartementet ville
vurdere om det er tilstrekkelig grunn til å utrede slike beslag.
Saken reiser vanskelige spørsmål, og en utredning vil ta noe tid.
Disse medlemmer mener at reglene
om tilbakeholdelse av ytelser og barnebidrag i bortføringssakene
må vedtas så raskt som mulig. Disse medlemmer støtter
derfor regjeringens vurdering om at proposisjonen legges frem uten at
disse spørsmålene er avklart. Disse medlemmer viser
videre til at departementet senere vil vurdere nye tiltak. Disse
medlemmer finner det på denne bakgrunn merkelig at medlemmene
fra Arbeiderpartiet og Senterpartiet synes det har tatt for lang
tid før proposisjonen ble fremmet av regjeringen. Det er fremmet
lovforslag på dette området flere ganger siden 2008. Med utgangspunkt
i vedtakene fra Stortinget ble det sendt ut et forslag på høring
i 2009, og først høsten 2013 kom forslaget til lovendring til Stortinget.
Regjeringen Stoltenberg II brukte svært lang tid på å fremme sitt
forslag til lovregulering på dette feltet. At den nye regjeringen brukte
5 måneder på å vurdere disse spørsmålene, og mulighetene for utvidelser
av anvendelsesområdet på nytt, ansees derfor ikke som lang tid.
Medlemene i komiteen frå Arbeidarpartiet
og Senterpartiet er undrande over at det har tatt lang tid
før proposisjonen var fremja på nytt.
Komiteen støttar forslaget
om at offentlege ytingar og barnebidrag skal haldast tilbake når
ein av foreldra har bortført eit barn til utlandet. Komiteen støttar
at offentlege ytingar på sperra konto skal bli utbetalt når
barnet er ført tilbake
ei rettsleg avgjerd eller avtale mellom
dei private partane fastset at barnet ikkje skal tilbake
vedtak vert gjort om etter § 10
det bortførte barnet er fylt 16 år
Komiteen vil vise til endring
frå Prop. 200 L (2012–2013) frå regjeringa Stoltenberg II til Prop.
39 L ( 2013–2014) frå noverande regjering, under forslag til ny
§ 11 som omhandlar sperra konto, herunder barnebidrag. Komiteen vil
understreke at både Prop. 200 L (2012–2013), som noverande regjering
trekte tilbake, og Prop. 39 L (2013–2014) foreslår at barnebidrag
også skal stoppast og setjast på sperra konto når eit barn blir
bortført til utlandet.
Komiteen vil vise til at Prop.
39 (2013–2014) ikkje foreslår særreguleringar for utbetaling av barnebidrag
til sperra konto for barn som er bortført mellom 16 og 18 år, slik
det vart foreslått i Prop. 200 L (2012–2013). Komiteen vil
påpeike at denne realitetsendringa i § 11 er svært vanskeleg å vite
om, då det ikkje står utgreia i proposisjonen. Komiteen meiner
det er utfordrande for komiteen at ein ikkje ut ifrå proposisjonens
tekst blir gjort godt nok merksam på dei faktiske endringane det
vil medføre.
Komiteen merkar seg at det står
følgjande under § 11:
Ǥ 11 Sperra konto
Pengar som vert
haldne tilbake, skal stå på sperra renteberande konto.
Offentlege
ytingar skal utbetalast til den som har rett til pengane eller rett
til å ta imot pengane på vegne av barnet, når
a) barnet er
ført tilbake,
b) det er avgjort rettsleg eller avtalt
mellom partane at barnet ikkje skal tilbake,
c) vedtak er gjort om etter § 10, eller
d) det bortførte barnet har fylt 16 år.
Barnebidrag på sperra konto skal utbetalast
til barnet når barnet fyller 18 år. »
Komiteen er gjort merksam på
at dersom ein ikkje foreslår ei særregulering for barnebidrag, jf.
barneloven når eit barn som er bortført er 16 år, vil ikkje barnebidraget
vert utbetalt til sperra konto med mindre det eksplisitt er foreslått
i paragrafen, slik Prop. 200 L (2012–2013) foreslo i § 11. Komiteen vil
då vise til at utbetaling av bidrag som forfell etter at barnet
har fylt 16 år, vert løyet heilt ut etter dei vanlege reglane i
barneloven, og utbetalast ikkje til ein sperra konto som følje av
at det ikkje er omtalt på noko anna vis i § 11. Komiteen meiner
det er viktig at dette blir belyst i saka og saknar ei tydeleggjering
av dette i proposisjonen.
Komiteen er samd i at barnebidrag
som er haldne tilbake, skal stå på renteberande sperra konto til
barnet fyller 18 år. Pengane skal då utbetalast til barnet. Dersom
barnet har fylt 16 år, utan at saka er løyst, bør bidrag gå inn
på sperra konto til barnet fyller 18 år. Dette vart føreslege i
Prop. 200 L (2012–2013), men er endra i føreliggjande proposisjon.
Komiteen fremjar difor følgjande
forslag:
Ǥ 11 tredje ledd skal lyde:
Barnebidrag for tidsrom etter at vilkåra i andre leddet
bokstavane a til c er oppfylte, vert utbetalt etter dei vanlege
reglane om dette. I andre tilfelle skal bidraget setjast på sperra
konto, også etter at barnet har fylt 16 år. Barnebidrag på sperra
konto skal utbetalast til barnet når barnet fyller 18 år.»
Komiteen sitt utkast til innstilling vart 1. april 2014
sendt familie- og kulturkomiteen for uttale. Familie- og kulturkomiteen
opplyste i brev av 10. april 2014 at dei ikkje hadde merknader,
men viste til dei respektive partia sine merknader i justiskomiteen.
Komiteen har elles
ingen merknader, viser til proposisjonen og rår Stortinget til å
gjere slikt
vedtak til lov
om stans i utbetalinga av offentlege ytingar og
barnebidrag når ein av foreldra har bortført eit barn til utlandet
§ 1 Formål
Formålet med lova er å fremje rask tilbakeføring av barn
som er bortførte til utlandet og å førebyggje slik bortføring.
§ 2 Kva lova gjeld
Lova gjeld for saker om bortføring av barn til utlandet.
Eit barn skal reknast for bortført dersom det til vanleg
er busett i Noreg, men er teke med til, eller vert halde tilbake
i, eit anna land i strid med reglane i barnelova om foreldreansvaret.
Det er også eit vilkår at
a. departementet handsamar saka som ei bortføringssak
etter reglane i Haag-konvensjonen frå 1980 om dei sivile sidene
ved internasjonal barnebortføring eller Europarådskonvensjonen frå 1980
om godkjenning og fullbyrding av avgjerder om foreldreansvar og
om gjenoppretting av foreldreansvar (heretter kalla «konvensjonane»),
b. politiet har registrert eit barn som sakna, eller
c. det er oppretta straffesak om barnebortføring.
Som barn skal reknast personar som ikkje har fylt 16 år.
§ 3 Definisjonar
Offentlege ytingar tyder i lova her
a. ytingar etter folketrygdloven, barnetrygdloven, kontantstøtteloven,
forskotteringsloven og andre lover som vert administrerte av arbeids-
og velferdsetaten,
b. stønad etter lov 18. desember 2009 nr. 131 om sosiale
tjenester i arbeids- og velferdsforvaltningen, og
c. bustøtte etter bustøttelova.
Barnebidrag tyder i lova her barnebidrag som vert kravd
inn av arbeids- og velferdsetatens innkrevjingssentral, med unntak
av oppfostringsbidrag fastsett etter barnevernloven § 9-2.
§ 4 Melding om barnebortføringar
til utlandet
Dersom departementet handsamar ei sak som ei bortføringssak
etter konvensjonane, skal det sende melding om dette til arbeids-
og velferdsforvaltninga og Husbanken. I andre bortføringssaker skal
det lokale politidistriktet sende melding når det har registrert
eit barn som sakna eller det er oppretta straffesak om barnebortføring.
Melding til Husbanken og den kommunale delen av arbeids-
og velferdsforvaltninga skal ikkje gje opplysningar om anna enn
at eit barn er bortført, personane saka gjeld og endringa i opphaldsstad.
Meldingar etter paragrafen her kan sendast utan hinder
av teieplikt.
§ 5 Stans i ytingar som ikkje
skal utbetalast i utlandet
Når eit barn er bortført, skal arbeids- og velferdsforvaltninga
og Husbanken stanse ytingar som det ikkje er grunnlag for å utbetale
i utlandet. Handsaming og klage følgjer dei vanlege reglane for
dei einskilde ytingane.
§ 6 Innkrevjing av barnebidrag
Barnebidrag skal krevjast inn etter dei vanlege reglane
så lenge barnet er bortført, anten det er bortføraren eller den
attverande av foreldra som er bidragspliktig. Det kan ikkje krevjast
endring av bidraget etter barnelova § 74 første leddet så lenge
bortføringa varar.
§ 7 Avgjerd om å halde tilbake
ytingar og
barnebidrag til bortføraren
Når eit barn er bortført til utlandet, skal Arbeids- og
velferdsdirektoratet eller eit særskilt utpeika organ i arbeids-
og velferdsetaten halde tilbake offentlege ytingar og barnebidrag
som vert utbetalte til bortføraren sjølv eller til bortføraren på
vegne av barnet. Dette gjeld ikkje dersom tiltaket må reknast som eit
uforholdsmessig inngrep ut frå den konkrete situasjonen. Ved vurderinga
skal ein mellom anna leggje vekt på kva dette har å seie for at
barnet kan bli ført tilbake, og på risikoen for at barnet og bortføraren vert
påført skade.
§ 8 Innhenting av opplysningar
i saker om å halde
tilbake ytingar og barnebidrag
Ved handsaminga av saker etter § 7 kan organet som skal
treffe avgjerda, krevje opplysningar frå instansar og personar som
er nemnde i folketrygdloven § 21-4 første leddet. Det er eit vilkår
at opplysningane er naudsynte for avgjerda og at ein ikkje kan skaffe
opplysningane på anna vis.
Ein kan til vanleg berre hente inn opplysningar om
a. namn, adresse, alder, slektskap og sivilstatus,
b. staden der barnet og bortføraren oppheld seg og tilhøva
som dei lever under,
c. den fysiske og psykiske helsa til barnet og bortføraren
og særlege behov og utgifter knytte til helsetilstanden deira,
d. bortføraren si inntekt og økonomi medan bortføringa varar,
og
e. tilhøva mellom foreldra og barnet.
Organ som tek del i handsaminga av ei barnebortføringssak,
skal gje opplysningar etter paragrafen her av eige tiltak.
Dei som skal gje opplysningar etter paragrafen her, skal
gjere dette utan hinder av teieplikt og utan godtgjersle.
§ 9 Sakkunnig vurdering
Dersom opplysningane i saka gjev grunn til det, kan organet
som skal treffe avgjerda etter § 7, be om at ein sakkunnig vurderer
om det er forsvarleg å halde tilbake ytingar og barnebidrag. Den
sakkunnige skal ha tilgang til dokumenta i saka og kan hente inn opplysningar
etter § 8. Sakkunnige har krav på godtgjersle for arbeidet sitt
og skal få dekt utlegg i samband med saka.
§ 10 Ny vurdering
Dersom nye opplysningar eller endringar i den einskilde
saka talar for det, skal ein vurdere å gjere nytt vedtak etter §
7. Saka skal i alle tilfelle vurderast på nytt når det har gått
to år etter bortføringa og barnet framleis ikkje er ført tilbake.
Ny vurdering kan skje utan hinder av avgrensingane i forvaltningsloven
§ 35.
§ 11 Sperra konto
Pengar som vert haldne tilbake, skal stå på sperra renteberande
konto.
Offentlege ytingar på sperra konto skal utbetalast til
den som har rett til pengane eller rett til å ta imot pengane på
vegner av barnet, når
a. barnet er ført tilbake,
b. det er avgjort rettsleg eller avtalt mellom partane at
barnet ikkje skal tilbake,
c. vedtak er gjort om etter § 10, eller
d. det bortførte barnet har fylt 16 år.
Barnebidrag for tidsrom etter at vilkåra i andre leddet
bokstavane a til c er oppfylte, vert utbetalt etter dei vanlege
reglane om dette. I andre tilfelle skal bidraget setjast på sperra
konto, også etter at barnet har fylt 16 år. Barnebidrag på sperra
konto skal utbetalast til barnet når barnet fyller 18 år.
§ 12 Ytingar og barnebidrag
til den attverande av
foreldra
Ytingar som den attverande av foreldra får utbetalt som
representant for eit bortført barn eller på grunn av omsorga for
barnet, vert utbetalte i opp til seks månader etter at barnet vart
bortført, men i opp til tolv månader dersom den attverande av foreldra framleis
har utgifter til omsorga for barnet eller dersom andre særlege grunnar
gjer det rimeleg.
Dersom barnebidrag framleis vert kravd inn frå bortføraren
etter at utbetaling er stansa etter første leddet, skal bidraget
setjast på sperra renteberande konto. Reglane i § 11 tredje ledd
gjeld tilsvarande.
Utbetalinga av ytingar etter første leddet og innkrevjing
av barnebidrag frå bortføraren skal stansast så snart det er avgjort
rettsleg eller avtalt mellom partane at barnet ikkje skal tilbake.
Handsaming og klage ved avgjerder om ytingar til den attverande
av foreldra etter paragrafen her, følgjer dei vanlege reglane for
dei einskilde ytingane.
§ 13 Saker der barnevernet har
omsorga for barnet
Lova gjeld også for saker der ein av foreldra eller begge
bortfører til utlandet barn som barnevernet har teke over omsorga
for. Barnevernet skal varslast og få høve til å uttale seg etter
reglane i forvaltningsloven § 16. Reglane i § 12 i lova her gjeld
tilsvarande.
Dersom foreldra er saman om bortføringa, kan tiltak etter
lova nyttast mot begge.
§ 14 Handsaming av saker om
å halde tilbake ytingar og barnebidrag
Ved handsaminga av saker etter §§ 7 til 11 gjeld reglane
i forvaltningsloven, med desse særreglane og presiseringane:
a. både bortføraren og den attverande av foreldra skal
reknast som part i saka ved avgjerder etter § 7,
b. avgjerd om ikkje å halde tilbake ytingar og barnebidrag
skal reknast for enkeltvedtak,
c. arbeids- og velferdsetaten og sakkunnige etter § 9 har
teieplikt etter reglane i arbeids- og velferdsforvaltningsloven
§ 7, og
d. avgjerder etter § 7 kan ikkje påklagast, men kan ankast
inn for Trygderetten etter reglane i lov 16. desember 1966 nr. 9
om anke til Trygderetten.
§ 15 Forskrifter
Departementet kan gje forskrifter til utfylling og gjennomføring
av lova, mellom anna til
a. § 4 om meldingar når barn er bortført,
b. § 7 om å halde tilbake ytingar og barnebidrag,
c. § 9 om oppnemning av og betaling til sakkunnige,
d. § 11 om sperra konto, og
e. § 12 om ytingar og bidrag til den attverande av foreldra.
§ 16 Ikraftsetjing og overgangsreglar
Lova gjeld frå den tid Kongen fastset.
Lova gjeld også der barnet vart bortført før
lova tok til å gjelde.
Ytingar eller barnebidrag for tidsrom før lova tok
til å gjelde, kan ikkje haldast tilbake med heimel i lova.
Jeg viser til brev 20. mars 2014 fra Justiskomiteen
i Stortinget, der det bes om en klargjøring av forskjellen mellom
Prop. 39 L (2013-2014) og Prop. 200 L (2012-2013) når det gjelder
§ 11 siste ledd.
Ulikheten mellom proposisjonene gjelder utbetaling
av barnebidrag for tiden etter at barnet har fylt 16 år, i de tilfeller
der bortføringssituasjonen ikke er løst ved tilbakeføring av barnet eller
på annen måte. EtterProp. 200 L (2012-2013)
skal bidraget i disse tilfellene fortsatt gå inn på sperret konto
og utbetales til barnet når barnet fyller 18 år. Etter Prop. 39
L (2013-2014) er det ikke gittanvisning
på dette forholdet, slik at det er de vanlige reglene etter barneloven
som gjelder.
Etter nærmere vurderinger foreslår jeg at forslaget
i Prop. 39 L (2013-2014) til § 11 tredje ledd i den nye loven endres
slik at det tilsvarer § 11 tredje ledd i forslaget i Prop. 200 L.
Jeg foreslår imidlertid en noe endret ordlyd, slik at regelen om
utbetaling ved barnets fylte 18 år går klarere fram:
«Barnebidrag for tidsrom etter at vilkåra i andre leddet
bokstavane a til c er oppfylte, vert utbetalt etter dei vanlege
reglane om dette. I andre tilfelle skal bidraget setjast på sperra
konto, også etter at barnet har fylt 16 år. Barnebidrag på sperra
konto skal utbetalast til barnet når barnet fyller 18 år.»
Oslo, i justiskomiteen, den 6. mai 2014
Hadia Tajik
|
Lene Vågslid
|
leiar
|
ordførar
|