Til Stortinget

1. Samandrag

1.1 Innleiing

I proposisjonen legg Barne-, likestillings- og inkluderingsdepartementet (BLD) fram endringsforslag på statsbudsjettet for 2010.

1.2 Kap. 820 Integrerings- og mangfalds-direktoratet

Post 1 Driftsutgifter

BLD arrangerer i 2010 fire folkemøte som skal skape dialog og engasjement rundt politikken på området og gi innspel om erfaringar og idear personar i lokalmiljøet har. Departementet føreslår å flytte 400 000 kroner for å dekkje utgifter til folkemøte frå kap. 821 post 71 til kap. 820 post 1.

1.3 Kap. 821 Busetjing av flyktningar og tiltak for innvandrarar

Post 60 Integreringstilskot, kan overførast

Løyvinga er basert på at 8 300 personar utløyser integreringstilskot for det første året i 2010. Talet er no venta å bli 7 850 personar. Utgifter til integreringstilskot for det første året blir dermed redusert. Utgifter til tilskot ved busetjing av personar med alvorlege, kjende funksjonshemmingar og åtferdsvanskar er høgare enn det som tidlegare blei lagt til grunn.

Post 62 Kommunale innvandrartiltak

BLD føreslår å nytte 500 000 kroner for å styrkje integreringsarbeidet for utsette grupper i innvandrarbefolkninga med utgangspunkt i rapporten om levekår for norsksomaliarar. Midla blir føreslått flytta frå kap. 821 post 71. Føremålet for bruk av midla er uendra, men mottakaren vil vere ein kommune eller bydel, og ikkje ein frivillig organisasjon.

1.4 Kap. 822 Opplæring i norsk og samfunnskunnskap for vaksne innvandrarar

Post 22 Norskprøver for vaksne innvandrarar

Løyvinga skal dekkje utgifter til gjennomføring av norskprøver for vaksne innvandrarar, og behovet er no venta å bli lågare enn føresett i 2010.

BLD føreslår å redusere løyvinga under kap. 822 post 22 med 1,4 mill. kroner.

Post 60 Tilskot til opplæring i norsk og samfunnskunnskap for vaksne innvandrarar

Løyvinga for 2010 er basert på at 13 400 personar er i målgruppa for opplæring i norsk og samfunnskunnskap i 2010 og vil utløyse førsteårs tilskot. Talet på personar i målgruppa som vil utløyse førsteårs tilskot er no venta å bli 11 500 personar. I tillegg blir fleire tilskot utbetalt seinare enn venta. Talet på asylsøkjarar som kjem inn under ordninga for opplæring i norsk i mottak er lågare enn det som tidlegare blei lagt til grunn for 2010.

BLD føreslår å redusere løyvinga under kap. 822 post 60 med 150,8 mill. kroner.

1.5 Kap. 3821 Busetjing av flyktningar og tiltak for innvandrarar

Post 1 Integreringstilskot for overførings-flyktningar, ODA-godkjende utgifter

Det er lagt til grunn at 100 prosent av overføringsflyktningane kjem frå ODA-godkjende land og at 50 prosent av utgiftene som blir dekka av første års integreringstilskot er ODA-godkjende. Integreringstilskotet har ulik sats for det første året mellom barn og vaksne. Endring i samansetjinga av barn og vaksne er årsaka til at løyvinga er venta å bli redusert.

BLD føreslår å redusere løyvinga under kap. 3821 post 1 med 450 000 kroner.

1.6 Kap. 3822 Opplæring i norsk og samfunnskunnskap for vaksne innvandrarar

Post 1 Norskopplæring i mottak, ODA-godkjende utgifter

95 prosent av utgiftene til norskopplæring i mottak blir rekna som ODA-godkjende utgifter. Ein reduksjon i talet på asylsøkjarar som kjem inn under ordninga for opplæring i norsk i mottak fører til ein reduksjon i utgifter til opplæring og ein reduksjon i ODA-godkjende utgifter.

BLD føreslår å redusere løyvinga under kap. 3822 post 1 med 29,7 mill. kroner.

2. Merknader og tilråding frå komiteen

Komiteen, medlemene frå Arbeidarpartiet, Lise Christoffersen, Roald Aga Haug, Håkon Haugli, Ingalill Olsen og Eirik Sivertsen, frå Framstegspartiet, Per-Willy Amundsen, Gjermund Hagesæter og Åge Starheim, frå Høgre, Trond Helleland og Michael Tetzschner, og frå Sosialistisk Venstreparti, leiaren Heikki Holmås, frå Senterpartiet, Ola Borten Moe, frå Kristeleg Folkeparti, Geir Jørgen Bekkevold, handsamar i innstillinga dei budjettkapitla som høyrer inn under rammeområde 6 Innvandring, regional utvikling og bolig.

Komiteen har ingen merknader, viser til proposisjonen og rår Stortinget til å gjere slikt

vedtak:

I statsbudsjettet for 2010 blir det gjort følgjande endringar:

Oslo, i kommunal- og forvaltningskomiteen, den 3. desember 2010