Vedlegg 2
Eg viser til Prop. 1 S (2009-2010) som no er til handsaming i Stortinget. I denne samanheng ønskjer eg å informera Stortinget om følgjande som har kome fram etter at budsjett-proposisjonen vart fremja:
I samband med arbeidet med Jernbaneverket sitt handlingsprogram for 2010-2019 og arbeidet med planen for verksemda til Jernbaneverket for 2010 i løpet av hausten 2009, har Jernbaneverket kome fram til at det er meir knapt med signalressursar enn tidlegare berekna. Signalkompetansen er ein kritisk ressurs for å få gjennomført fleire av jernbaneprosjekta som er omtala i Prop. 1 S (2009-2010). Eg vil i denne samanheng visa til at det i budsjettproposisjonen for 2010 er teke inn ei omtale av "Tiltak for å sikre nok personalressurser i jernbanesektoren", der signalmontørar- og ingeniørar er nemnt, jf. side 132-133. Dessutan viser eg til omtalen av problema omkring godkjenninga av den nye typen signal- og sikringsanlegg/ Merkur som Jernbaneverket har leveringskontraktar med hos ABB. Dette legg også beslag på signalfolk i Jernbaneverket, jf. side 135-136.
På grunn av at det er mangel på signalfolk har Jernbaneverket sett i gang eit arbeid med å gjennomgå og eventuelt leggja fram ein ny signalstrategi for jernbanenettet i Noreg for å kunna optimalisera bruken av den knappe signalkompetansen. Ein ny signalstrategi må og sjåast i samanheng med den planlagde innføringa av eit nytt signal- og sikringssystem, European Rail Trafic Management System (ERTMS) som følgjer av forskrift om samtrafikkevne i den internasjonale togtrafikken.
Eg viser elles til at det under omtalen av dei store jernbaneanlegga som er gjeve i Samferdselsdepartementets budsjettproposisjon for 2010, har i forhold til dei utfordringane Jernbaneverket har med signalkompetanse.
Samferdselsdepartementet vil om naudsynt koma tilbake til Stortinget når konsekvensane av ein ny signalstrategi er nærmare avklart.
Eg viser til St.prp. nr. 72 (2008-2009) Om nokre saker på Samferdselsdepartementets område. I vedlegg 1 til proposisjonen er det ei liste over riksvegar med tilhøyrande gang- og sykkelvegar. I framlegg til vedtak vert Stortinget m.a. bede om å samtykkja i at riksveg med tilhøyrande gang- og sykkelveg som går fram av vedlegg 1, med heimel i veglova § 62 tredje ledd, blir omklassifisert til fylkesveg, i Oslo kommunal veg, med verknad frå 1. januar 2010.
Osan ferjekai i Svolvær var ikkje med i vedlegg 1 til St.prp. nr. 72 (2008-2009). Bakgrunnen for at ikkje denne vart teken med i oversikten over nedklassifiseringar i samband med forvaltningsreforma i St.prp. 72 (2008-2009)var at ein arm av E10 går ned til ferjekaia. Da sambandet Svolvær-Skrova vart omklassifisert til fylkesvegsamband frå 1. januar 2009, vart ikkje ferjekaia i Svolvær omklassifisert på grunn av riksvegsam- bandet Svolvær- Skutvik. Skutvik ferjekai er no vedteke omklassifisert, jf. handsaminga av St.prp. nr. 72 (2008-2009).
Eg finn det naturleg at Nordland fylkeskommune, på line med ansvaret for ferjemateriell, også får ansvaret for ferjekaiene i dei omtala sambanda. Eg legg derfor til grunn at også ferjekaia i Svolvær vert omklassifisert til fylkesvegkai frå 1. januar 2010.
Midlar til drift og vedlikehald, av dei ferjekaier som vert omklassifiserte, vil overførast fylkeskommunane i samband med forvaltningsreformen. Drifts- og vedlikehaldmidlar til ferjekaier vert rekna ut etter ein generell behovsmodell.
Det er ikkje gjort framlegg om investeringsmidlar til ferjekaiene i dei omtalte sambanda i Samferdselsdepartementet sitt framlegg til riksvegbudsjett for 2010. For framtidig fylkesvegnett er investeringsmidlane for 2010 i all hovudsak fordelte på grunnlag av generelle kriterium (vegstandard, folketal og veglengde) og bindingar. Ingen av dei omtala ferjekaiene har bindingar pr. 1. januar 2010.