Departementet gjer framlegg om desse endringane på statsbudsjettet for 1998:

Kyrkjeleg administrasjon

Det er no gjort avtale mellom Kopinor og Kirkens Arbeidsgiverorganisasjon som regulerer all framtidig kopiering i kyrkjelydane, jf. åndsverklova. Departementet gjer i proposisjonen nærare greie for avtalen, som føreset eit eingongsvederlag for all vederlagspliktig tidlegare kopiering i Den norske kyrkja. Etter forhandlingar er eingongsvederlaget fastsett til 7,5 mill. kroner, og departementet gjer framlegg om å auke kap. 294 med denne summen.

Det er stort behov for vikartenester for prestane, jf. St.prp. nr. 64 (1997-98). Bispedømma har sett i verk innstrammingstiltak i 1998, men det er likevel eit stort tilleggsbehov på vikarbudsjettet, som vert å styrke med 10,7 mill. kroner over kap. 295.

Statens lånekasse for utdanning

Når det gjeld kap. 2410, gjer departementet framlegg om å auke driftsutgiftene med 3 mill. kroner i samband med utvals- og utviklingsarbeid. Omlagløyvinga til utdanningsstipend er auka med 113 mill. kroner. Dette følgjer av reglane for folkehøgskoleelevar og av dei to etterbetalingane til studentar i utlandet pga. svekka kronekurs. Overslaget for reisestipend innanlands er justert noko ned. Men samstundes har det vore fleire gebyrstipend. Valutaendringane har òg gjort tala høgare. Omlagløyvinga til andre stipend er difor auka med 40 mill. kroner. Vidare er rentestønaden auka med 37 mill. kroner ut frå dei siste prognosane. Overslaget for avskrivingar etter hovudfag og avskrivingar for lånekundar som bur i Finnmark, er sett ned med 72 mill. kroner. Det er ikkje behov for løyving til tap på utlån i 1998. Dette gir ein reduksjon på 20 mill. kroner. Lån til studentar i utlandet har auka både i tal og storleik i undervisningsåret 1997-98. Omlagløyvinga over post 90 er difor auka med 45 mill. kroner.

Over kap. 5310 er inntektene frå gebyr auka med 10 mill. kroner. Bakgrunnen er at det har vore fleire andregongsvarsel og oppseiingar av lån. Avdraga over post 90 vert å redusere med 500 mill. kroner ettersom ekstraordinære avdrag til no i 1998 har vorte reduserte til om lag halvparten. Endra overslag over tap og avskrivingar gir ein reduksjon på 106 mill. kroner. Over kap. 5617 er rentene frå Lånekassa auka med 27 mill. kroner. Bakgrunnen er at redusert avdragsinngang har ført til auka behov for innlån og dermed høgare rentekostnader.

Tilskot til trudomssamfunn m.v.

Over kap. 210 er omlagløyvingane i tilskot til livssynssamfunn og trudomssamfunn utanfor Den norske kyrkja auka med til saman 9,2 mill. kroner. Bakgrunnen er auke i satsane pr. medlem og auka medlemstal.

Når det gjeld tilskot til privateigde skole- og kyrkjebygg, er det kome inn søknader som gir grunnlag for tilskot på om lag 6 mill. kroner meir enn det som er løyvd til dette. Departementet gjer framlegg om å auke løyvinga tilsvarande for ikkje å få eit etterslep i 1999.

Utgiftskapittel som gjeld grunnskole og vidaregåande opplæring

Over kap. 221 gjer departementet framlegg om å redusere tilskotet til verkemiddeltiltak i Nord-Noreg med 10 mill. kroner. Mindrebehovet har samanheng med den gamle ordninga og at det har vorte færre verkemiddelskolar. Fleire elevar i skolefritidsordningar enn føresett gir eit meirbehov i tilskot i skolefritidsordningar på 5 mill. kroner. Mindrebehovet i tilskot til kommunale musikk- og kulturskolar er på 5 mill. kroner. Løyvingane vert å redusere tilsvarande. Tilskotsordninga for investeringar i skolebygg for 6-åringar er avslutta. Løyvinga på 49 mill. kroner over kap. 229 som vart overført frå 1997, vil difor ikkje bli nytta.

Tilskotet til undervisning for framandspråklege elevar har eit mindreforbruk i grunnskolen på 38 mill. kroner (kap. 221) og i vidaregåande opplæring på 4 mill. kroner (kap. 231). Departementet gjer framlegg om å redusere løyvingane tilsvarande. Færre fiskarar enn venta har delteke på tryggleikskurs og repetisjonskurs. Løyvinga over kap. 232 er difor redusert med 1,9 mill. kroner. På grunn av mindreforbruk gjer departementet framlegg om å redusere kvalitetssikringstilskotet til lærebedrifter med 175 mill. kroner. Tilskotet til vaksne lærlingar som må reise bort for å ta deler av opplæringa, er redusert med 4,5 mill. kroner (kap. 234). Omlegginga av dei statlege vidaregåande skolane i landbruksfag og naturbruk gir eit mindrebehov på 3 mill. kroner. Omlagløyvinga i tilskot til private skolar er sett ned med 18 mill. kroner (kap. 240). Tilskotet til internasjonale utdanningsprogram er redusert med 2,3 mill. kroner som følgje av tilbakeført kontingent til EU frå 1996 (kap. 239).

Utgiftskapittel som gjeld høgare utdanning

For Noregs teknisk-naturvitskapelege universitet er posten for kjøp av eigedom under kap. 262 auka med 11,8 mill. kroner mot ein tilsvarande reduksjon av kap. 743, jf. St.prp. nr. 18 (1998-99). Noregs handelshøgskole har ved ein feil ført inntekter frå mastergradstudiet på inntektskapitlet utan å rekneskapsføre tilsvarande utgifter over posten for særskilde driftsutgifter (kap. 264). Departementet gjer framlegg om å auke utgiftsløyvinga med 1,57 mill. kroner på grunn av dette.

Over kap. 281 gjer departementet framlegg om å redusere dei felles driftsutgiftene for universitet og høgskolar med 19,3 mill. kroner. Bakgrunnen er den endra forskriften til tenestemannslova frå 1.august 1998 som gir høve til tilsetjing i post doc-stillingar. Budsjetteffekten i 1998 har vore mindre enn tidlegare lagt til grunn. Endra valutakurs har auka kontingenten til internasjonale program slik at tilskotet vert å auke med 2,5 mill. kroner.

Parallelle endringar i inntekts- og utgiftsløyvingar

Departementet gjer framlegg om å setje ned nokre inntektskapittel og å redusere utgiftsløyvingane tilsvarande for å dekke inn inntektssvikten. Kap. 243, kap. 262, kap. 273 og kap. 281 er i framlegget redusert med til saman 11,6 mill. kroner og dei tilhøyrande inntektskapitla er reduserte med same sum.

Der inntektene har vorte høgare enn dei vedtekne inntektsløyvingane, gjer departementet framlegg om å auke desse løyvingane og å justere opp dei tilsvarande utgiftsløyvingane. Dette gir ein samla auke i utgiftsløyvingane på 340,2 mill. kroner over kapitla som gjeld skole og opplæring (kap. 203, kap. 232, kap. 243 og kap. 244), universiteta (kap. 260, kap. 261, kap. 262 og kap. 263), einskilde høgskolar (kap. 264, kap. 265, kap. 268, kap. 273, kap. 278 og kap. 279) og dei statlege høgskolane (kap. 274), og over kap. 280, kap. 283 og kap. 297. Inntektskapitla er auka tilsvarande.