Tabellen nedanfor syner dei største statsinntektene i form av skattar og avgifter for perioden 1990-1994 i mill. kroner.

Tabell 14. Større statsinntekter (mill. kroner)

	1990	1991	1992	1993	1994
Statsskatt inkl. arveavgift	20.613	20.875	15.096	10.615	10.943
Folketrygdavgifter	75.298	79.060	81.929	78.175	81.419
Oljeskattar	26.058	32.093	25.484	26.614	24.497
Meirverdi- og investeringsavgift	61.110	61.383	65.403	71.931	79.324
Andre særavgifter	34.986	37.179	42.137	40.422	45.720
Sum	218.065	230.590	230.049	227.757	241.903

       Reduksjonen i provenyet frå statsskatten dei siste åra skuldast i vesentleg grad at den progressive statsskatten på alminneleg inntekt (tidlegare kalla nettoinntekt) fall bort i 1992. Ordinær skatt på inntekt og formue inneheld i 1994 toppskatt for personlege skattytarar, ordinær statsskatt for etterskottspliktige skattytarar for inntektsåret 1993 og betalingar som gjeld tidlegare inntektsår for både forskotts- og etterskottspliktige skattytarar.

       Frå 1993 til 1994 har de viktigaste avgiftene til folketrygda, dvs. arbeidsgjevaravgifta og trygdeavgifta, auka med til saman 4,1 %

       Meirverdi- og investeringsavgifta auka med 10,3 % frå 1993 til 1994, som i høg grad kan forklarast med auken i privat konsum.

       Det går fram av tabellen at avgifter til folketrygda og meirverdi- og investeringsavgifta har vore dei viktigaste inntektskjeldene til staten dei siste åra. Til saman utgjorde desse inntektskjeldene i 1994 knapt 161 mrd. kroner.

       Skattar og avgifter i samband med utvinning av petroleum var ca 24,5 mrd. kroner i 1994, som svarar til ein reduksjon på 8 % frå 1993.

       Inntekter frå andre særavgifter og toll viser ein samla auke på 13 % frå 1993 til 1994. Ei viktig forklaring på denne auken er den høge importen av bilar i 1994, og dermed stor auke i importavgifter.