Post 73 (Ny) Tilskudd til etterbruksfond, kan overføres

       Det gjerast framlegg om ei løyving på 110 mill. kroner.

       Det knytter seg framleis stor utryggleik til etterbruksfondet sin endelege storleik. Sluttsummen vil blant anna avhenge av kva for inntekter i OL-budsjettet som vil vert innbetalde i 1995 og 1996. Overslaget som Regjeringa har valt å bruke som utgangspunkt for fordelinga tyder på at etterbruksfondet totalt vil verte tilført ca 365 mill. kroner, tilsvarande dei 401 mill. kroner som er omtala i Gul Bok for 1995, neddiskontert til prisnivået i dag.

       Restsummen er i samsvar med Regjeringa sitt framlegg i statsbudsjettet for 1995, vedteke løyva i 1995, jf. B.innst.S.nr.5 (1994-1995).

       Komiteen viser til at Kommunal- og arbeidsdepartementet har ansvaret for fordeling og utbetaling av etterbruksfondet. Komiteen vil vise til dei einstemmige merknadene under dette kapitlet i B.innst.S.nr.5 (1994-1995).

       Komiteen har elles ingen merknader og sluttar seg til Regjeringa sitt framlegg.

Post 76 Oppfølging av regionale forsøk

       Det vert gjort framlegg om at løyvinga vert auka med kr 2.674.000, frå kr 14.650.000 til kr 17.324.000.

       Aukinga er naudsynt for å kunne innfri staten sine forpliktingar. Då løyvinga blei gjeven i 1993, var det ein føresetnad at utbetalingane skulle skje i 1993, 1994 og 1995. Kr 8.034.000 som stod ubenytta ved utgangen av 1993, blei ført attende til statskassa. Med omsyn til inndekkjinga vert det vist til kap. 550 post 52.

       Komiteen har ingen merknader og sluttar seg til Regjeringa sitt framlegg.