Regjeringa legg i proposisjonen fram forslag om ny utbygging av Ekofiskfeltet, som skal gi ei langsiktig løysing for å ta vare på ressurs- og tryggingsomsyn for felta i utvinningsløyve 018 (utv.løyve 018).

       Nærings- og energidepartementet viser til at ein 31. desember 1993 mottok søknad om godkjenning av endra plan for utbygging og drift for felta i utv.løyve 018, som m.a. omfattar Ekofiskfeltet. 14. mars 1994 mottok departementet eit tillegg til endra plan for utbygging og drift, som gjer greie for det aktuelle utbyggingsalternativet for nye innretningar på Ekofiskfeltet kalla Ekofisk IIA.

       Departementet viser vidare til at felta i utv.løyve 018, spesielt Ekofisk og Eldfisk, representerer eit monaleg attverande ressurspotensial på 450-550 mill. tonn oljeekvivalentar (toe.).

       Som fylgje av det høge risikonivået på Ekofisktanken, det at produksjonsinnretningane vert eldre og innsenking av havbotnen på Ekofiskfeltet, meiner departementet det er turvande med ei omfattande nyutbygging av Ekofisksenteret.

       Ekofisk IIA-planen vil etter departementet si vurdering sikre verdiskapinga i utv.løyve 018 på lang sikt. Prosjektet har ein noverdi før skatt på om lag 19 mrd. 1994-kroner ved ein oljepris på 108 kroner pr. fat. Det vert i proposisjonen vist til at gjennomføring av planen inneber miljømessige gevinstar ved at m.a. utslepp av CO₂ vert redusert med inntil 0,9 mill. tonn i året frå det nivået det ligg på i dag. Vidare gjev prosjektet ei monaleg betring av tryggleiken for menneske, miljø og materielle verdiar på feltet.

       Det er i proposisjonen gjort detaljert greie for:

-	felthistorie og bakgrunnen for nyutbygginga,

-	fullmaktshandsaming og planane til rettshavarane,

-	endra plan for utbygging og drift av Ekofisk,

-	transport sørover til kontinentet.

       Departementet viser til at det er innhenta fråsegner frå Oljedirektoratet når det gjeld ressursmessige, tekniske og økonomiske tilhøve, og frå Kommunal- og arbeidsdepartementet når det gjeld tryggleiksmessige tilhøve ved Ekofisk IIA. Konsekvensanalysen som tek for seg miljø- og samfunnsmessige konsekvensar av prosjektet, har vore sendt på høyring til dei departement og instansar som den kan få verknader for. Departementet har vidare utrekna den samfunnsøkonomiske lønsemda av Ekofisk IIA.

       Det vert vist til at både departementet og Phillips sine utrekningar viser at Ekofisk IIA er eit samfunnsøkonomisk lønsamt og robust prosjekt med basisføresetnadene. Vidare er det eit oppsidepotensial knytta til auka produksjon frå Ekofiskfeltet utover dei produksjonsoverslaga som er grunnlag for utrekningane.

       Ut frå ei samla vurdering av samfunnsøkonomisk lønsemd, ressursforvalting, og i tillegg tryggleiksmessige og miljømessige omsyn, meiner departementet at Ekofisk IIA-planen bør realiserast. På bakgrunn av den tryggleiksmessige situasjonen på Ekofisksenteret meiner ein det er viktig å sikre ein rask oppstart av prosjektet med sikte på at det skal stå ferdig i 1998.

       Departementet viser vidare til at ein er generelt oppteken av at rettshavarane på norsk sokkel skal stå overfor rammeføresetnader som sikrar ein høgast mogleg verdiskaping frå verksemda samstundes som rammeføresetnadene skal sikre størst mogleg statlege inntekter. Etter departementet si vurdering blir dette teke vare på gjennom rammeføresetnader som gjer at selskapa vel samfunnsøkonomisk gjennomtenkte løysingar. I denne samanhengen ynskjer departementet også å få det konsesjonsjuridiske rammeverket for utv.løyve 018 meir i samsvar med det rammeverket som gjeld for nyare utvinningsløyve.

       Etter departementet si vurdering vil dei tilrådde endringane i rammeføresetnadene for utv.løyve 018 og transportrøyrledningane i Norpipe a.s. gi grunnlag for ei framleis monaleg verdiskaping frå verksemda i Ekofiskområdet, og såleis også høge statlege inntekter m.a. gjennom ein auka statleg eigardel. Endringane i rammeføresetnadene vil gi grunnlag for ei utbyggingsløysing på Ekofiskfeltet som sikrar ei betre utnytting av ressursane på lang sikt. Tryggleiken ved drifta vil bli betre og ein vil få monalege miljøgevinstar.

       Departementet sitt forslag legg vidare opp til at rettshavarane i utv.løyve 018 får tryggleik for framtidige transportføresetnader ved at Norpipe a.s. sine drifts- og anleggsløyve skal halde fram. Vilkåret for forlenging er at transport- og eigaravtalane for Norpipe vert endra med sikte på å få ein betre samfunnsøkonomisk utnytting av transportsystemet og tryggje staten sine økonomiske interesser.

       Departementet gjer i proposisjonen framlegg om å forlengje konsesjonstida for utv.løyve 018 og drifts- og anleggsløyva for Norpipe a.s. olje- og gassrøyr til høvesvis England og Tyskland til 2028.

       Departementet vil frå 1. januar 1999 auke Den norske stats oljeselskap a.s. sin eigardel i utv.løyve 018 frå 1 % til 5,95 % ved at det vert innført ein direkte statleg del (SDØE) på 5 %. Den norske stats oljeselskap a.s. vil frå og med 1. juli 1994 dekkje ein del av investeringane i Ekofisk IIA tilsvarande den auka eigardelen.

       Departementet gjer vidare framlegg om å gi fritak for utrekning av produksjonsavgift for olje og våtgass produsert frå utv.løyve 018 frå tidspunktet for ferdigstilling av Ekofisk IIA definert som det tidspunktet Oljedirektoratet gjev samtykke til bruk av transport og prosessplattformen 2/4J.

       Departementet gjer framlegg om å forlengje drifts- og anleggsløyva for Norpipe a.s. til 31. desember 2028 med vilkår om at eigaravtalar og transportavtalar vert endra i samsvar med omtale i denne proposisjonen.

       Departementet vil, når dei eksisterande drifts- og anleggsløyva for Norpipe er gått ut, auke Den norske stats oljejselskap a.s. sin eigardel i Norpipe frå 50 % til 70 % ved at det vert innført ein direkte statleg del (SDØE) på 40 %

       Departementet viser til at dei løyvingsmessige konsekvensane for SDØE i 1994 som fylgje av godkjenning av endra plan for utbygging og drift for Ekofiskfeltet knyter seg til kap. 2440, kap. 5440 og i tillegg kap. 2800 og kap. 5800. Kap. 2440, post 24. Driftsresultat blir foreslått høgda med 2 mill. kroner som fylgje av auka renter. Kap. 2440, post. 30. Investeringar blir foreslått høgda med 84 mill. kroner. Kap. 5440, post 80. Renter blir foreslått høgda med 2 mill. kroner. Desse endringane vil føre til ein samla reduksjon av staten sin samla kontantstraum frå petroleumsverksemda på 84 mill. kroner. I samsvar med dette gjer ein framlegg om at kap. 2800, post 50. Overføringar til fondet og kap. 5800, post 50. Overføring frå fondet blir sett ned med 84 mill. kroner.