Departementet gjer framlegg om ei ny lov om heilagdagar og heilagdagsfred. Bakgrunnen for lova er m.a. reaksjonane på manglande høve til å arrangere dans og filmframsyningar i påske- og pinsehøgtida. Departementet har teke omsyn til fråsegnene då eit lovutkast var til høyring i 1989.

       Lovframlegget inneber ei fornying og forenkling av gjeldande lov frå 1965. Tidsrommet for den alminnelege heilagdagsfreden og forbodet mot å forstyrre gudstenester blir utvida til å gjelde heile døgnet, alle heilagdagar og likeeins høgtidskveldane etter kl. 16.00. Dei noverande forboda mot ulike offentlege arrangement på heilagdagar blir oppretthalde i grunntrekka, men avgrensa i tid til å gjelde mellom kl. 06.00 og kl. 13.00 alle heilagdagar.