Ved lov av 18. november 1994 er det vedteke reglar om korreksjonsinntekt og reverseringsfrådrag i selskapsskattelova § 1-6, jf. Ot.prp. nr. 82 og Innst.O.nr.77 (1993-1994). Korreksjonsinntekt fastsett etter desse reglane skal reknast med i resten av den allmenne inntekta til selskapet, jf. Ot.prp. nr. 82 (1993-1994) side 14. Reverseringsfrådrag skal trekkjast i frå inntekta etter særlege reglar.

       Når det gjeld personinntekt fastsett etter delingsmodellen, går det fram av føresegna i skattelova § 60 første ledd at ein skal ta utgangspunkt i den skattepliktige inntekta til selskapet når ein skal rekna seg fram til personinntekta. Dette gjer at korreksjonsinntekta i utgangspunktet skal inngå i grunnlaget for utrekning av personinntekt. Det same gjeld reverseringsfrådrag. Over tid vil dette gå opp i opp.

       Meininga med korreksjonsskatten er å sikre seg mot skattefrie utdelingar til aksjonærane av kapital som ikkje er skattlagd som allmenn inntekt i selskapet. Departementet meiner at ein regel som gjer at korreksjonsskattesystemet påverkar personskatten går lengre enn kva omsyna bak dette systemet gjer nødvendig. Det vil òg skape likningstekniske problem om slik korreksjonsskatt og reverseringsfrådrag skal påverke grunnlaget for personskatt.

       Departementet gjer framlegg om at skattelova § 60 første ledd vert endra slik at det kjem klårt fram at korreksjonsinntekt og reverseringsfrådrag skal haldast utanfor personinntekta. Ein syner til utkast til ny § 60 første ledd.

Komiteens merknader

       Komiteen slutter seg til proposisjonen.