Per Olaf Lundteigen (Sp): Stadnamnutvalet har vedteke å endre bygdenamnet Vassgård, i Eide kommune i Møre og Romsdal, til Vasskor. Dei som bur i bygda vil ikkje merke postkassane sine med det nye namnet og nektar å ta imot og returnerer post med den nye adressa Vasskor. Det einaste bygdefolket krev er å få behalde det opprinnelege bygdenamnet sitt Vassgård.
Kva vil statsråden gjere med at det som framstår som eit brot på stadnamnlova har ført til at bygdenamnet Vassgård, brukt gjennom meir enn 100 år, er endra til Vasskor?
Grunngiving
Stadnamnutvalet har bestemt å endre bygdenamnet Vassgård i Eide kommune, som har vore bygdas namn i meir enn 100 år. Det nye namnet Vasskor ville ingen i bygda ha og difor reiv dei ned skiltet med Vasskor, som Statens Vegvesen sette opp 1. februar 2017.
Eide kommunestyre har to gonger samrøystes vedteke at bygdenamnet skal vere uendra og at bygda framleis skal heite Vassgård.
Desse vedtaka er neglisjerte av stadenamnutvalet, Saka gjekk difor til klagenemnda for stadnamn. Klagenemnda gjorde ikkje det den skulle, men gjorde vedtak om å endre namnet til eit nytt namn Vasskor. Klagenemnda gjorde eit nytt enkeltvedtak, som elles forvaltningslova gjev klagerett. Det er vel og lite tvilsamt at klageorganet her har gått utover sitt mandat.
Prosessen i kommunen og seinare stadnamnutvalet i Kartverket har i telefon vedgått at prosessen med høyring ikkje vart følgd då det er krav om at bygda skal få høve til å uttale seg og ikkje få tredd vedtak nedover hovudet slik som i denne saka.
Når ei bygd misser namnet slik som Vassgård har gjort i denne saka må dette vere eit brot på føremålsparagrafen i stadnamnlova.
Når stadnamnutvalet køyrer over bygdenamnet slik at dei tvingar på bygda eit nytt namn som ingen vil merke postkassane sine med og nektar å ta imot post merka med det nye bygdenamnet Vasskor, må det vere noko demokratisk gale når fleire saksbehandlingsfeil ligg bak og er grunnen til det nye namnet. Det nye bygdenamnet må slik vere ulovleg og må underkjennast og bygda må få tilbake det rette namnet sitt som var Vassgård og som alle i bygda ønskjer å behalde.