Spørsmål

Kjersti Toppe (Sp): Kystverket har gitt Forsvarets forskingsinstitutt (FFI) i oppdrag å modellere og berekne risikoen for detonasjon og brist i vraket av den tyske ubåten U-864 utanfor Fedje. Bakgrunn for oppdraget kom som følgje av motstridande vurderingar mellom FMA, FFI og FOH om eksplosjonsfaren, i rapportane som kom i 2025. FFI hadde frist til 1. mars 2026 med å levere denne rapporten.
Vil statsråden sørge for at rapporten blir gjort offentleg?

Begrunnelse

Det er viktig for den vidare prosessen at offentlegheita tidleg får kjennskap til FFI sine vurderingar i denne saka.

Svar

Marianne Sivertsen Næss: Kystverket har gitt Forsvarets forskingsinstitutt (FFI) i oppdrag å gjennomføre ulike modelleringar og utrekningar for å kunne seie meir om risikoen knytt til torpedoane i vrakdelane av U-864. På grunn av omfanget av arbeidet er rapporten frå FFI forseinka, og Kystverket ventar å motta rapporten seinast 1. mai.

Kystverket har i samband med den pågåande utgreiinga bestilt fleire vurderingar innan ulike område for å redusere uvissa i ein plan for eit endeleg tiltak. Desse rapportane vil bli lagt ved Kystverket si vurdering og tilråding til Nærings- og fiskeridepartementet, og vil etter planen vere offentlege når tilrådinga blir oversendt i slutten av mai 2026.