Skriftlig spørsmål fra Jenny Klinge (Sp) til helse- og omsorgsministeren

Dokument nr. 15:3207 (2024-2025)
Innlevert: 26.09.2025
Sendt: 29.09.2025
Besvart: 08.10.2025 av helse- og omsorgsminister Jan Christian Vestre

Jenny Klinge (Sp)

Spørsmål

Jenny Klinge (Sp): Kan statsråden orientere om, og eventuelt korleis, det i arbeidet med dei nordiske og nasjonale kosthaldsråda i HOD, Helsedirektoratet eller andre underliggande organ/forvaltning har vore brukt ekstern kommunikasjonsrådgiving i utforminga av den faglege og/eller politiske bodskapen i perioden 2017-2025?

Begrunnelse

Utforming av kosthaldsråda skal vera prega av faglege vurderingar, men fag og forsking er heile tida under utvikling og gjenstand for (faginterne og offentlege) debattar. Det ligg sjølvsagt også politikk i både dei nordiske og dei nasjonale kosthaldsråda.
Det er ein politisk dimensjon ved bodskapen kring eksisterande kosthaldsråd, og ved arbeidet med og bodskapen om kosthaldsråd som er under utvikling. Samt ved nye kosthaldsråd som myndigheitene skal orientere om.
Offentleg pengebruk til eventuelle kommunikasjonsbyrå eller andre eksterne krefter som bidreg til utforminga av bodskap/kommunikasjon/argumentasjon er eit tema i seg sjølv. Det er også interessant å vita korleis helsemyndigheitene går fram når dei utformar den bodskapen som dei skal bruke i møte med andre aktørar i ulike prosessar som gjeld kosthaldsråda. Dessutan korleis helsemyndigheitene går fram når dei skal informere og/eller delta i debatt offentleg om tematikken kosthaldsråd, både medan slike råd er under utvikling og når det føreligg ferdige kosthaldsråd for ein periode.

Jan Christian Vestre (A)

Svar

Jan Christian Vestre: Dei nyaste nordiske ernæringsråda (NNR) vart publiserte i 2023, og dannar det vitskaplege grunnlaget for dei nasjonale næringsstofftilrådingane og matbaserte kosthaldsråda i Danmark, Finland, Island, Noreg, Sverige og dei baltiske landa. Arbeidet med NNR var eit reint vitskapleg arbeid, og openheit var viktig i prosessen. Det vart gjennom heile arbeidet lagt opp til omfattande høyringar av bakgrunnsartiklar og kapitla i NNR, både gjennom fagfellevurderingar og frå næringa, forbrukarar og andre interessentar. Det var likevel viktig å skilje det vitskaplege arbeidet med NNR frå direkte påverknad frå næringsinteresser og politiske interesser. Også uavhengigheit blant forskarane som deltok i det vitskaplege arbeidet var svært viktig, og dei som deltok måtte signere ein uavhengigheitserklæring.
I Noreg er det Helsedirektoratet som har ansvar for å utarbeide nasjonale kostråd. Dei norske kostråda vart lanserte i august 2024. Desse er utelukkande baserte på samanhengen mellom kosthald og helse. I tillegg er det publisert ein artikkel på nettsidene til Helsedirektoratet om korleis ein kan ta klimahensyn innan kvart av råda, utarbeidd av Miljødirektoratet med bakgrunn i NNR.
For å utforme dei nye kostråda nytta Helsedirektoratet ein kunnskapsbasert tilnærming. NNR 2023 utgjorde det vitskaplege forskingsgrunnlaget for kostråda. I tillegg er utforminga av råda basert på eit innsiktsarbeid som inkluderer klinisk erfaring og brukarerfaring. Det vart sett ned ei prosjektgruppe i Helsedirektoratet for revideringa av kostråda. Prosjektgruppa bestod av tilsette med kompetanse innan ernæring og kommunikasjon.
For å få betre innsikt i forståing, behov og bruk av kostråda blant befolkninga og andre aktørar, gjennomførte Helsedirektoratet eit omfattande innsiktsarbeid. Innsiktsarbeidet vart utført av Opinion, som leverte ein endeleg rapport til Helsedirektoratet. Arbeidet inkluderte både kvantitative og kvalitative undersøkingar i eit representativt utval av befolkninga og relevante grupper av helsepersonell og andre faggrupper. Helsedirektoratet nytta rapporten i arbeidet med å formulere forståelege og brukarvenlege kostråd. I tillegg var kostråda ute på offentleg høyring våren 2024. Alle høyringsinnspela er publiserte på helsedirektoratet.no.
Helsedirektoratet har ikkje nytta ekstern kommunikasjonsrådgiving i utforminga av kostråda, eller til førebuing av debattinnlegg, pressehenvendingar m.m. For å auke kjennskapen til dei nye kostråda gjennomførte Helsedirektoratet ein reklamekampanje i vekene etter lansering. Helsedirektoratet nyttar vanlegvis eksterne medie- og reklamebyrå til brei ekstern kommunikasjon. Desse bistår med kjøp av medieplassering og bidreg til å lage kampanjar. Det faglege innhaldet er alltid styrt direkte av Helsedirektoratet.