Alfred Jens Bjørlo (V): Det spesialtilpassa SAS-flyet som Forsvaret mellom anna bruker til luftevakuering av skada ukrainske soldatar til sjukehus i Europa (MEDEVAC), går mot slutten av si levetid på grunn av maksgrenser for driftstimar og flyoperasjonar.
Kan Forsvarsministeren forsikre om at det er nødvendig framdrift i arbeidet med å få på plass eit nytt spesialtilpassa fly i tide til å unngå avbrot i dette viktige norske bidraget til Ukraina, når vil det nye flyet stå klart og ligg det føre ein plan for å handtere ei eventuell forseinking?
Begrunnelse
Flyet omtalt i spørsmålet blir også nytta til andre typar luftevakueringsoppdrag av norske og andre statsborgarar og har mellom anna blitt brukt i samband med evakuering frå krigen på Gaza, jordskjelvet i Tyrkia, Kongen sin sjukdom på utanlandsreise etc - men har dei to siste åra først og fremst blitt brukt til å bistå Ukraina.
I følgje pressemelding frå Forsvaret i mai 2025, er det i perioden 2022-2025 evakuert over 3.300 såra og sjuke ukrainske pasientar og pårørande til sjukehus i Europa.
Forsvarsministeren sa i mai 2025 at «Vi er stolte av å kunne fortsette dette viktige arbeidet. De medisinske evakueringene vil fortsette i takt med behovene som melder seg fra de ukrainske helsemyndighetene.» (Pressemelding frå regjeringa 9/5-25).
Eg og Venstre tolkar dette som at regjeringa vil sørge for å halde fram med transporten også etter at noverande avtale med EU om medisinsk evakuering utløper i mars 2026, og noverande avtale mellom Forsvaret og SAS utløper på same tidspunkt.