Skriftlig spørsmål fra Geir Pollestad (Sp) til næringsministeren

Dokument nr. 15:3080 (2024-2025)
Innlevert: 03.09.2025
Sendt: 03.09.2025
Besvart: 10.09.2025 av næringsminister Cecilie Myrseth

Geir Pollestad (Sp)

Spørsmål

Geir Pollestad (Sp): Næringsdepartementet utnemnde 29. august advokat Mads Magnussen til direktør i Konkurransetilsynet for seks år frå 1. januar 2026. I lys av situasjonen med aukte matvareprisar er det særs viktig med ein offensiv, uredd og uavhengig konkurransdirektør. Det kjem no fram informasjon i media, m.a. i Nettavisen 2. september, som problematiserer utnemninga.
Kan næringsministeren forsikre oss om at den nye konkurransedirektøren vil vere offensiv, uredd og uavhengig overfor aktørane i daglegvarebransjen?

Begrunnelse

Mads Magnussen er ny direktør for Konkurransetilsynet, men valet har skapt debatt. Han kjem frå advokatfirmaet Wikborg Rein, der han nyleg har representert NorgesGruppen – den største aktøren i daglegvaremarknaden. Mellom anna har han vore involvert i oppkjøpet av Vitusapotekene, ei sak som framleis er til behandling hjå Konkurransetilsynet. Fleire ekspertar uttrykkjer uro. Professor Bent Sofus Tranøy meiner utnevninga svekkjer tilliten til tilsynet og kallar det eit døme på «bananrepublikk-tendensar». Jussprofessor Jan Fridthjof Bernt har også uttalt seg. Magnussen kan bli inhabil i saker han har hatt direkte rolle i, som den såkalla prisjegersaka, der daglegvarekjedene har fått milliardbøter. Gjeve situasjonen der norske forbrukarar opplever ein særs stor prisauke på mat og det er mistanke om dårleg konkurranse i daglegvaremarknaden, er det svært viktig at ny konkurransedirektør vil vere offensiv, uredd og uavhengig overfor aktørane i daglegvarebransjen. For alle nordmenn som et og kjøper mat er det viktig å vete om næringsministeren har gått alle dei naudsynte stega for å finne den konkurransedirektøren som er best i stand til å bidra til lågare matprisar. Dei høge matprisane er utfordrande for kvardagsøkonomien til mange nordmenn, og det er å vente at næringsministeren gjer sitt ytste i dette spørsmålet.

Cecilie Myrseth (A)

Svar

Cecilie Myrseth: Konkurransetilsynet har et viktig samfunnsoppdrag: Fremje konkurranse til fordel for forbrukarane og næringslivet. I dag pregar raske endringar og nye utfordringar samfunnsutviklinga. Det stiller høge krav til konkurransepolitikken og Konkurransetilsynet.

Effektiv konkurranse i daglegvarebransjen er viktig for at forbrukarane skal få eit godt daglegvaretilbod. Eg er bekymra for at konkurransen i daglegvarebransjen ikkje er så god som den kan og bør vere. Marknaden pregs av få og store aktørar, og det er vesentlege etableringshindringar. Vidare har prisveksten for matvarer og alkoholfri drikke over tid vore høgare enn den generelle prisveksten i samfunnet. Dette er krevjande for mange hushaldningar. Regjeringa har derfor iverksett ei rekkje tiltak for å betre konkurransen i daglegvarebransjen. Blant annet har vi styrka Konkurransetilsynets løyving, og gitt tilsynet nye verkemiddel.

Eg meiner Mads Magnussen er det riktige valet som ny direktør for Konkurransetilsynet. Han har mange års erfaring med EU/EØS- og konkurransesaker. Med omfattande erfaring som advokat innan konkurranserett, og med erfaring frå EFTA-domstolen og som juridisk direktør i Konkurransetilsynet, har Magnussen solid konkurransefagleg kompetanse. Han har også eit stort engasjement for feltet, og har blant anna publisert ei rekkje artiklar om ulike konkurransefaglege tema. I tillegg har Magnussen lang erfaring som dommar. I den perioden var han også settekonkurransedirektør. I forbindelse med tilsettinga av ny konkurransedirektør har eg blant anna lagt vekt på at Konkurransetilsynets saksbehandling i større og større grad blir utfordra rettsleg. Magnussen sin bakgrunn er særleg relevant i denne situasjonen. Med si erfaring frå både privat og offentleg sektor, er Mads Magnussen svært godt kvalifisert til å leie Konkurransetilsynet framover.

Det er kjent at Magnussen har hatt oppdrag for NorgesGruppen ASA. Frå og med utnemninga vil ikkje Magnussen jobbe med saker som har med Konkurransetilsynet å gjere, og han sluttar i Wikborg Rein Advokatfirma før han tiltrer som konkurransedirektør.

Det er den enkelte tilsette i offentleg sektor som har ansvaret for å vurdere habiliteten sin. Det at Magnussen har hatt NorgesGruppen som ein av sine klientar gjer han ikkje automatisk inhabil i alle saker som gjeld NorgesGruppen. Habilitet skal vurderast konkret i kvar einskild sak. Spørsmål om habilitet oppstår i saker som Magnussen har vore involvert i som advokat. Magnussen har erfaring med å gjere slike vurderingar, blant anna som dommar.

Konkurransetilsynet har gode rutinar for å handtere spørsmål om habilitet. For pågåande saker hos Konkurransetilsynet som Magnussen har vore involvert i som advokat, vil det oppnemnes settekonkurransedirektør. Dette er i tråd med gjeldande rutinar, og er også gjort ved andre anledningar, der tidlegare konkurransedirektørar har vore inhabile. Eg har derfor full tillit til at Konkurransetilsynet også framover vil behandle saker med same profesjonalitet og høge faglege standard som i dag.