Ingrid Fiskaa (SV): Statnett har hatt ny linjetrase for 420 kV kraftlinje mellom Sauda og Gismarvik ute på høyring. I høyringssvara sine har formannskapet i Vindafjord og kommunestyret i Etne vedteke krav om utgreiing av sjøkabel som alternativ for luftkabel på strekninga.
Vil statsråden ta initiativ til at ei slik utgreiing vert gjort?
Begrunnelse
Statnett planlegg oppgradering av linjenettet mellom Sauda og Gismarvik. Traseen vil gå gjennom kommunane Sauda, Etne, Vindafjord og Tysvær. Alle desse kommunane har alt store kraftlinjer gjennom sine natur-, friluftsliv- og jordbruksområde.
Framlegga til ulike trasear har vore orientert om på folkemøte og har vore ute på høyring. Den politiske handsaminga i Etne og Vindafjord konkluderte med krav om utgreiing av sjøkabel som alternativ. Det same er konklusjonen i mange av høyringssvara og i det som kom fram på folkemøta.
Utbygginga er ei oppgradering av eksisterande linjenett. Noverande trasé kan ikkje nyttast, fordi straumnettet må vera operativt i byggeperioden. Dermed vert det dobbel belastning på områda som linja vil gå gjennom.
På store delar av strekninga som er aktuell for sjøkabel, går i dag utanlandskabelen mellom Noreg/Suldal og England. Dermed er det alt gjort erfaring med sjøkabel i dette området.
Kostnad er ofte argumentet for at luftkabel skal bli brukt. I utgreiingar vert det konkludert med at sjøkabel kostar mykje meir enn luftkabel. Erfaring frå mellom anna prosjektet Blåfalli – Gismarvik viser at luftlinja vert mykje dyrare enn først rekna, slik at den reelle skilnaden i kostnad ikkje kjem fram på planleggingstidspunktet.
Denne planlagde traseen, der det alt er sjøkabel, bør bli nytta som eit strekk der ein tar i bruk unntaka i Stortingsmelding 14 (2011 – 12). Det er tid for å gje samfunnsøkonomi eit anna innhald enn berre kroner og øre.