Ingrid Fiskaa (SV): I desember vart Manal (4) og fem andre hardt skadde born som er offer for israelske krigsbrotsverk evakuert til Noreg for medisinsk behandling. Jenta fekk asyl i Noreg i lag med mora. Far og veslebror, som berre var 1 år då Manal og mora flykta, er igjen i Gaza. For å få familiegjenforeining må dei ta DNA-test i Jordan.
Vil utanriksministeren sørge for bistand slik at far og veslebror til Manal raskt kan evakuerast frå Jabalia og reisa til Amman før Israel erobrar Gaza og fordriv befolkninga til lukka interneringsleirar?
Begrunnelse
Tamara, Ahmad og borna Manal (4) og Rajab (2) vart utsett for eit israelsk bombeangrep i november 2023. Manal, som me vart kjende med på Dagsrevyen laurdag 3. mai, vart alvorleg skadd med ryggmargsbrot og sit no i rullestol. Etter ei dramatisk flukt frå Gaza til Egypt vart Manal og mora saman med fem andre born henta til Noreg av norske styresmakter i desember i fjor. Etter tre månadar behandling er dei no i Oslo. Far Ahmad og veslebror Rajab er igjen i Jabalia i Nord-Gaza.
Tamara er aleine med det store ansvaret om å følgje opp dotter si, samstundes som ho lever i konstant bekymring for sønen sin Rajab på to år. Ho har ikkje sett han på over eitt år. Det går iblant dagar utan at Tamara får tak i mannen sin, uviss om dei er drepne eller ikkje. Tamara og Manal går til behandling hos psykologspesialist som skildrar Tamara i akutte stressreaksjonar. Manal saknar far og bror, og strevar med å akseptera skaden og splittinga av familien.
Det er søkt om familiegjenforening og UDI har opna saka deira. I går sendte UDI eit brev til Tamara og Ahmad der dei godkjenner at DNA-testing kan utførast ved næraste ambassade. I deira tilfelle vil dette vera Amman i Jordan eller Egypt. Ahmad og Rajab er i Jabalia i Nord-Gaza og dei har inga moglegheit til å koma seg ut derifrå på eiga hand. UDI har gjort det klart at dei ikkje kan hjelpa med evakuering, men at dette må ligga hjå Utanriksdepartementet.
Det siste døgnet har Israel annonsert at dei skal okkupera heile Gazastripa og fordriva alle i Nord-Gaza til Rafah-området Sør i Gaza. Det kan ikkje understrekast nok kor kritisk situasjonen er og kor mykje det haster å få dei ut. Vi ber derfor innstendig om at UD tar saka og kontaktar Verdas Helseorganisasjon, Cogat (Coordinator of Government Activities in the Territories), eller andre moglege samarbeidspartnarar, for å mogleggjera utreise frå Gaza i løpet av svært kort tid, før Ahmad og Rajab blir internert i ein lukka leir i Sør-Gaza.
Tamara og Manal har fått asyl i Noreg. Norske styresmakter henta dei hit, utan at pappa og lillebror fekk vera med. No er familien splitta midt i eit folkemord.