Sigbjørn Gjelsvik (Sp): Kan statsråden garantere at alle berørte kommunar og fylke, kvar for seg og i sum, vil bli fullt ut kompensert ved ei eventuell overføring av ansvar for bruvedlikehald m.m., jf. Vegdirektoratet sitt høyringsforslag, korleis vil i så fall vedlikehaldsetterslepet bereknast og kompenserast, og meiner statsråden at ei slik overføring av ansvarsforhold vil bidra til ei betre og meir effektiv forvaltning av desse bruene?
Begrunnelse
Syner til statsråden sitt svar av 21. februar d.å., knytt til Vegdirektoratet sitt høyringsforslag til forskrift om ansvarsforhold m.m. når offentlige veger krysser hverandre i samme plan eller ved overgangsbru eller vegundergang. Av svaret framgår at "Per i dag finst det ikkje tilstrekkeleg underlagsmateriale for å kunne berekne vedlikehaldsetterslepet på den enkelte bru" som forskrifta får verknad for.
I spørjetimen 5. mars i år svara Kommunal- og distriktsminister Kjersti Stenseng underteikna at:
"Det er et etablert prinsipp, som ulike regjeringer har forholdt seg til, at kommuner og fylkeskommuner samlet sett skal kompenseres fullt ut for nye oppgaver. Dette er nødvendig for at kommunesektorens økonomiske handlingsrom skal opprettholdes. Kompensasjonen fastsettes med utgangspunkt i beregninger av de samlede kostnadene på innføringstidspunktet, og dette er den enkelte fagstatsråds ansvar."
Stenseng understreka vidare at:
"Det følger fra sektoransvarsprinsippet at den enkelte fagstatsråd – og nå snakker vi om samferdsel – er ansvarlig for å sørge for at hvis den enkelte statsråd pålegger nye oppgaver i egen sektor, må vedkommende også sørge for at det kompenseres, ut fra beregningene om det følger kostnader med den nye oppgaven."
Av dette følgjer tydeleg at kostnadene må bereknast før ei eventuell overføring av ansvar kan gjennomførast. Dernest er dette ei sak som egnar seg dårleg for generell kompensasjon til sektoren gjennom inntektssystemet. Antall bruer av den type det er snakk om i høyringsdokumentet frå Vegdirektoratet, og kostnaden ved desse, vil variere svært mykje mellom ulike kommunar og fylke i landet. Nokre kommunar har ikkje slike bruar i det heile, medan det for andre vil kunne vere store beløp. Dernest kjem spørsmålet om det i det heile er hensiktsmessig å overføre ansvaret for desse bruene. Bruene kryssar statleg veg, som ofte kan vere høgtrafikkerte vegar, er bygd av staten og vil som regel stå på statleg grunn. Det er vanskeleg å sjå at det vil vere ei effektiv løysing at einskildkommunar skal måtte bygge opp kompetanse for å sitte med ansvar for planlegging og gjennomføring av vedlikehald på desse bruene - i staden for at det Statens vegvesen framleis sit med samla ansvar for slik infrastruktur på dei vegstrekningar dei har det i dag.