Skriftlig spørsmål fra Alfred Jens Bjørlo (V) til næringsministeren

Dokument nr. 15:1720 (2024-2025)
Innlevert: 23.03.2025
Sendt: 24.03.2025
Besvart: 31.03.2025 av næringsminister Cecilie Myrseth

Alfred Jens Bjørlo (V)

Spørsmål

Alfred Jens Bjørlo (V): Regjeringa har over lang tid gitt inntrykk av å ønskje ei satsing på reiselivet i Noreg. Etter snart fire år i regjering er det likevel få konkrete resultat av den uttrykte ambisjonen, og heller ingen konkrete planlagde tiltak eller mål for satsinga, utover auka skattar. Regjeringa.no si temaside for reiseliv er ikkje oppdatert sidan november, då regjeringa sende forslaget om innføring av turistskatt på høyring.
Korleis vil regjeringa konkret følgje opp si uttalte satsing på reiseliv, utover innføringa av ein turistskatt?

Begrunnelse

Både i Hurdalsplattformen og i regjeringa sin eksportstrategi "Heile Noreg eksporterer" er reiseliv trekt fram som eit prioritert satsingsområde. I mai i fjor sa statsråden sjølv at "Reiselivet ligger hjertet mitt nært.
Likevel ser det ut til at regjeringa si uttalte satsing på reiseliv har blitt redusert til eit forslag om å påføre norske reiselivsbedrifter auka kostnader gjennom mellom anna auke i formuesskatten som rammar norskeigde hotell hardt, og varsla innføring av ein ekstra "hotellskatt" (turistskatt) som m a utanlandske cruiserederi slepp.

Cecilie Myrseth (A)

Svar

Cecilie Myrseth: Noreg har ein sterk posisjon som reisemål internasjonalt. Vi har naturlege og unike fortrinn som gjer at vi har eit stadig meir populært reisemål for besøkande frå heile verda. Reiseliv er ein viktig føresetnad for gode lokalsamfunn over heile landet, og skaper monalege ringverknader for andre næringar. Regjeringa har store ambisjonar for reiselivsnæringa og vil leggje til rette for eit reiseliv som er konkurransedyktig, har lågt klima- og miljøavtrykk, respekterer naturen og lokalsamfunna sine tolegrenser og gir lønsame heilårige arbeidsplassar og attraktive reisemål i heile landet. Regjeringa sitt arbeid for reiseliv inneber ei heilskapleg satsing der vi og ivaretek lokalsamfunn, menneske og natur i områda som får besøk. For at reiselivsnæringa skal vekse vidare, må det skje innanfor berekraftige rammer. Regjeringa har tydeleggjort desse måla for reiselivsnæringa i Veikart for reiselivsnæringen, presentert i februar 2023.
Vi skal nå ambisjonane gjennom å leggje til rette for lønsame produkt og eit stadig meir attraktivt reiselivstilbod i Noreg, gjennom utvikling av norske reisemål i ei meir berekraftig retning, og gjennom utvikling av det internasjonale marknadsarbeidet på ein strategisk måte, som er i tråd med våre ambisjonar for norsk reiseliv. Innovasjon Noreg sitt reiselivsoppdrag er eit sentralt verkemiddel i reiselivspolitikken. I statsbudsjettet for 2025 er løyvinga til Innovasjon Noreg sitt reiselivsarbeid auka med 10 mill. kroner, til 205 mill. kroner. Vi er også godt i gang med dei ulike satsingsområda i vegkartet gjennom fleire konkrete initiativ: regjeringa si eksportsatsing for reiseliv, støtte til arbeid med Norsk Standard for guidar, etterfølging av forsking- og innovasjonsrapporten frå strategigruppa Reiseliv 2030, og gjennom forslag om å innføre besøksbidrag.
Når det gjeld forslaget om å innføre eit besøksbidrag, er det etterspurd av fleire norske kommunar. Dette skal vere frivillig å innføre og vil sikre at turistar bidreg til å finansiere fellesgode dei nyttar seg av.
Bakgrunnen for forslaget er at fleire turistar betyr eit auka press på fellesgode, som til dømes tilgang til stiar, offentlege toalett og søppelhandtering. I høyringsnotatet om forslag til lov om besøksbidrag føreslår regjeringa å gi kommunane eit nytt verktøy til å handtere utfordringane. Forslaget om kommunal overnattingsavgift er første fase av regjeringa sitt besøksbidragsprosjekt. I fase to vil vi greie ut besøksbidrag frå cruiseverksemd, med mål om å innføre det.
Dersom Noreg skal vere eit attraktivt reisemål for norske og utanlandske turistar i åra som kjem, må næringsliv, regionale og statlege myndigheiter saman ta tak i utfordringane som fleire besøkande fører med seg. Berre slik kan reiselivsnæringa halde fram med å vekse og utvikle seg som ei berekraftig næring.