Skriftlig spørsmål fra Frank Edvard Sve (FrP) til samferdselsministeren

Dokument nr. 15:1657 (2024-2025)
Innlevert: 18.03.2025
Sendt: 18.03.2025
Besvart: 24.03.2025 av samferdselsminister Jon-Ivar Nygård

Frank Edvard Sve (FrP)

Spørsmål

Frank Edvard Sve (FrP): Kan samferdselsministeren forklare kvifor ein EU-kontroll av norske bilar IKKJE kan gjennomførast i eit EU-land av godkjente verkstadar til slike kontrollar der?

Begrunnelse

Det er i dag her i landet krav om EU kontroll av bilar over ein viss alder. Disse kontrollane kan takast ved verkstadar som er godkjente for å kunne gjennomføre slike EU-kontrollar.
Så opplever enkelte som er i utlandet på langtidsferie at EU-kontrollen nærmer seg fristen for datoen dette skal vere gjennomført, og ønsker å ta denne EU-kontrollen i til dømes Tyskland, Spania eller i Italia.
Då får desse beskjed om at dei fint må køyre bilen tilbake til Norge, og at denne så kalla EU-kontrollen IKKJE kan takast i eit til dømes EU-land.
Med andre ord, ein eigar av ein Ford kan altså ikkje køyre inn på eit stort Ford-senter i til dømes Spania, Italia eller i Tyskland for å kunne gjennomføre ein EU-kontroll som er heilt lik i heile EU og som Norge også følger.

Jon-Ivar Nygård (A)

Svar

Jon-Ivar Nygård: Periodisk kontroll av køyretøy, også kjend som EU-kontroll, byggjer på harmoniserte minimumskrav som alle medlemsland i EØS må følgje når dei kontrollerer køyretøy registrert i sitt eige land. Det vil så vere opp til kvart enkelt land å tilpasse si kontrollordning utover desse minimumskrava.
Hovudregelen er at medlemslanda i EØS godkjenner kontrollar gjennomførte av kontrollorgan i sitt eige land. Det er gjort mange nasjonale tilpassingar i kontrollane grunna det enkelte medlemsland sin geografi, klima med vidare. Dei nasjonale kontrollane skil seg difor frå kvarandre når det kjem til omfang og metode. I Noreg har vi til dømes eigne, nasjonale kontrollpunkt for køyretøy med elektrisk eller hybrid framdrift, som ikkje nødvendigvis vil bli sjekka i ein kontroll gjord i eit anna land. Skulle vi i Noreg opna for godkjenning av kontrollar gjennomført i eit anna EØS-land, ville det difor vere ein risiko for at køyretøyet får køyre på norske vegar utan at våre nasjonale kontrollpunkt er kontrollerte.
I Noreg har vi gjort tiltak for å verifisere at kontrollørane er godkjende, mellom anna ved at kontrollørane skal nytte ID-porten for kvar enkelt innrapportering av kontrollresultat. Tilsvarande løysing finst ikkje internasjonalt for å verifisere til dømes kontrollsedlar, kontrollørar og kontrollorgan frå EU-kontrollar i andre land.
I 2018 blei regelverket endra slik at ein sjølv kan velje når ein ønsker å gjennomføre EU-kontrollen, så lengje køyretøyet er godkjend innan fristen. Til dømes er det mogleg å gjennomføre EU-kontrollen sommaren før, sjølv om kontrollen er på vinteren, viss ein for eksempel slik representanten viser til planlegg ein tur til utlandet, eller har ein bobil som berre blir nytta om sommaren. Fristen for neste kontroll blir rekna frå tidspunktet for når siste kontroll er gjennomført.
Eg meiner gjeldande reglar på dette området er hensiktsmessige. Fleksibiliteten i regelverket som det er vist til ovanfor, sørgjer for at dei som vil ta med seg bilen til eit anna land, kan gjennomføre EU-kontrollen i forkant av reisa.