Alfred Jens Bjørlo (V): Kva rutiner har kommunal- og distriktsministeren etablert for å sikre at statlege stillingar med fleire alternative geografiske lokasjonar blir lyst ut på ein likeverdig og like lett søkbar måte for potensielle søkarar på alle aktuelle destinasjonar, og ikkje med t d berre lokasjon Oslo som betalt søk i utlysingar og søkemotorar på nettet slik Mattilsynet no gjer med juriststillingar som fram til no har vore lokalisert i Bergen?
Begrunnelse
Det ligg godt til rette for at langt fleire statlege stillingar enn i dag, også i nasjonale funksjonar, blir lyst ut med mulighet for lokalisering ved avdelingskontor i den aktuelle statlige etaten eller meir generelle statlige «kontorhubar» andre stader i landet. Dette er viktig både for å sikre spreiing av makt og å hindre for sterk sentralisering av statlege kompetansemiljø i Oslo – og for å auke tilfanget av kompetente søkarar.
Eit ferskt døme frå Mattilsynet, som etter omlegginga frå geografisk organisering til funksjonsorganisering i éin nasjonal organisasjon, lyser ut stillingar som jurist i eit fagmiljø som pr i dag har base i Bergen, med mulighet for lokalisering fleire stader i landet – men berre legg inn Oslo som «betalt søk» i Finn og tilsvarande søkemotorar på nettet.
Det betyr i praksis t d at ein jurist i Oslo som har lagt inn at hen ønsker varsel om ledige stillingar som passar med sin profil, vil få varsel om desse utlyste stillingane, mens ein jurist i Bergen (der stillingane er lokalisert i dag) eller andre stader i landet ikkje vil få tilsvarande varsel om utlysinga.
Det er interessant å vite i kva grad Kommunal- og distriktsministeren kjenner til kor utbredt denne praksisen med manglande reell sidestilling av lokasjonar i stillingar med fleire alternative geografiske plasseringar er i ulike statlege etatar – og om han meiner denne praksisen er i tråd med regjeringa sin lokaliseringspolitikk for statlege stillingar.