Alfred Jens Bjørlo (V): Korleis vil statsråden sikre den faglege kvaliteten i den varsla «prioriteringa av breddekompetanse» i fagfeltet palliasjon utan først å sikre at kompetanseområdet palliasjon med tilhøyrande sertifisering blir vidareført, og kvifor stiller statsråden opp ei motsetjing mellom breddekompetanse og spesialisert kompetanse på fagfeltet når det ikkje er tvil om at begge deler er nødvendig, og den spesialiserte kompetansen er nødvendig for å kunne gi fleire breddekompetanse?
Begrunnelse
Palliativ behandling er eit fagfelt som det dessverre vil bli større etterspurnad etter i åra framover fordi det blir mange fleire eldre. Det er aukande uro i samfunnet over om vi alle får god nok behandling og støtte når vi skal døy.
Likevel veljer statsråden å avvikle eit godt, felles-nordisk utdanningsopplegg for legar som leiar fram til ei sertifisering i kompetanseområdet palliativ medisin. Det vil føre til dårligare behandling over heile landet, fordi desse legane driv utstrekt rettleiing overfor legar i andre spesialitetar, fastlegar og kommunane.
Statsråden har tidligare på spørsmål frå andre representantar svart at han vil prioritere breiddekompetanse. For Venstre er det openbart at ein må styrke kompetansen hos alle som arbeider med døande. På same måte er det openbart behov for spesialisert kompetanse for trygg behandling av pasientar med vanskelege problemstillingar og for god fagleg støtte i heile behandlingskjeden.