Skriftlig spørsmål fra Liv Kari Eskeland (H) til samferdselsministeren

Spørsmål

Liv Kari Eskeland (H): Kan statsråden gjera greie for korleis universell utforming blir sikra i neste fase av Norske togs innkjøp av fjerntog, og vil toga ha trinnfri innstiging?

Begrunnelse

Etter press frå fleirtalet i Transport og kommunikasjonskomiteen og fleire interesseorganisasjonar sende statsråden eit brev til Jernbanedirektoratet med oppdrag om å vurdera løysingar for å sikra universell utforming i nye fjerntog.
I mai kom Jernbanedirektoratet med rapporten “Økt tilgjengelighet i nye fjerntog – sluttrapport”. I rapporten stadfestar Jernbanedirektoratet at det er fullt mogleg å leggja til rette for trinnfri tilkomst og for rørslefridom i toget for reisande som nyttar rullestol. Vurderinga av trinnfri tilkomst med innvendige ramper viste at alternativet bidrog positivt til å oppnå målet om sjølvstendige reiser, men at graden av måloppnåing var avhengig av tiltak for å heva plattformer til 76 cm.
Statsråden og medlemmene i Transport- og kommunikasjonskomiteen fekk før sommaren eit brev frå Funksjonshemmedes fellesorganisasjon, Norges Blindeforbund og Norges Handikapforbund med eit felles krav om trinnfri tilkomst på 76 plattformer med intern oppramping dersom opsjon om kjøp av 83 fjerntog frå Stadler blir nytta.
Statsråden har denne veka stadfesta at han både skal skrota flytoget, og vil bruka meir pengar på at toga skal gå presist. Det er på sin plass å spørja korleis han jobbar for at fleire kjem seg på toga og korleis han følgjer opp prosessane han sjølv har sett i gang gjennom rapporten om auka tilgjengelegheit i nye fjerntog.

Svar

Jon-Ivar Nygård: Eg har allereie gjort ei rekke grep for å sikre at dei nye fjerntoga blir så tilgjengelege som teknisk mogleg, for så mange som mogleg. Dei fyste 17 toga som kjem til Noreg vil vere utforma på eit vis som gjer at eit større område om bord i toga blir tilgjengeleg for dei reisande som sit i rullestol eller reisande som på anna vis har behov for meir plass. Det gjeld til dømes tilgang til restauranten om bord i toga og vogn med familieavdeling. Rullestolplassane blir betre integrert med andre sitteplassar i toget, og det vil i dei nye toga vere betre moglegheiter for rullestolbrukarar å reise med kjeledyr. Toga er utstyrt med to ekstra rullestolheiser, noko som gjer innstiginga til toget enklare. Toga har eit ekstra toalett som er tilpassa reisande som har behov for meir plass. Dei nemnde grepa vil gjere det meir attraktivt for alle reisande å bruke fjerntoga, og innebere ein betydeleg forbetring samanlikna med dagens fjerntogmateriell.
Eg har bedd Jernbanedirektoratet og Norske tog om å utgreie om og i så fall korleis vi kan gjere ytterlegare tilpassingar i ein eventuell opsjon i avtalen om kjøp av nye fjerntog, og kva som er konsekvensane av ytterlegare endringar i materiellets utforming for dei reisande, dei som arbeider om bord og dei som drifter toga. Ei føring for arbeidet var at brukarorganisasjonane skulle involverast. Utgreiinga omhandlar både tiltak for å sikre auka tilgjengelegheit i toga og enklare åtkomst til toget frå plattform. I utforminga av togsetta ligg det ei rekke avvegingar som det gjeld å finne ei løysing på som er leveleg for alle. Eg fekk rapporten, med interesseorganisasjonanes innspel, oversendt i juli. Eg vurderer no tiltaka.

Stortinget.no

Skriftlig spørsmål fra Liv Kari Eskeland (H) til samferdselsministeren

Spørsmål

Begrunnelse

Svar