Bakgrunn
Kvar fjerde kilowatt-time som blir produsert
av straum i Noreg, blir produsert i Vestland fylke. Vestland har
dei siste åra utarbeidd omfattande planar for korleis fornybar energi
kan nyttast til auka verdiskaping i små og store lokalsamfunn, både
gjennom utvikling av eksisterande næringsliv og ny grøn industri
(Grøn Region Vestland).
Ein stor flaskehals for å kunne realisere desse
planane, er mangel på infrastruktur for å ta krafta i bruk. Det gjeld
også «kortreist kraft» nær der energiproduksjonen skjer. Eit godt
døme på dette er region Fjordane, der utviklinga av industri og
næringsliv no stoppar opp på grunn av manglande transformatorkapasitet
til å kunne ta straumen i det eksisterande og nyleg utbygde 420
kW-nettet i bruk lokalt og regionalt.
I region Fjordane har det i lang tid vore planlagt
ein ny og moderne trafostasjon på Grov i Kinn kommune. Det vil få
store, positive ringverknader for heile Sunnfjord-regionen, mellom
anna for den viktige næringslivsbyen Florø og industrikommunen Bremanger,
og vil gjere det mogleg å realisere grøne næringslivsatsingar med
stor samfunnsverdi, av global interesse. Berre i Florø åleine, står
no nær 220 MW av nye prosjekt i «nettkø».
Planane om ny trafo på Grov har unison lokal
og regional støtte, også frå Vestland fylke, og har over fleire
år blitt halde fram som det viktigaste tiltaket staten kan bidra
med for å legge til rette for utvikling og industrivekst i regionen.
Også i samband med føreståande elektrifisering
av Tampen-feltet utanfor Florø vil påkobling til ein ny trafo på
Grov kombinert med ilandføring av kraft frå havvindprosjekt vere
ei ønskt løysing. Trafoen kan også koblast på med ei ny linje frå
vindparken Guleslettene som ligg nær ved, og der det ligg føre planar
om utviding for å auke tilgangen til fornybar energi i regionen
ytterlegare.
Likevel har planane om utbygging av trafo på
Grov stoppa opp frå Statnett si side. Det gjer også at Equinor har
starta planlegging av å elektrifisere Tampen med å bygge kabel heilt
frå Ålfoten i Bremanger. Det er ei suboptimal løysing sett i eit
samla samfunnsperspektiv, og vil høgst truleg forseinke utbygginga
av ny trafo på Grov ytterlegare. Det vil ramme den framtidige kraftforsyninga
til industri og næringsliv i regionen hardt.
Forslagsstillarane meiner det er nødvendig å
sikre bygging og oppgradering av fleire strategisk plasserte transformatorstasjonar
raskare enn det som er planlagt til no. Det er viktig både for å
legge til rette for lokal og regional grøn verdiskaping, og for
å auke viljen og interessa blant kommunar med energiressursar til
å ta i bruk desse ressursane til oppgradering og utbygging av meir fornybar
energi.
Dersom ein ikkje frå nasjonalt politisk hald
klarer å skjere gjennom og gi styringssignal som sørger for at nøkkelprosjekt
for grøn samfunnsutvikling av denne typen blir realisert raskt,
så vil det undergrave både mogleghetene for grøn omstilling av Noreg,
utvikling og vekst rundt om i regionar i Noreg med god krafttilgang –
og bremse viljen og interessa blant norske kommunar for å legge
til rette for utbygging av meir fornybar energi.