Forslagsstillar peikar på at Forsand kommune var ein kommune som, fram til 31. desember 2019, omkransa heile Lysefjorden i Rogaland. 1. januar 2020 vart kommunen, med unntak av delar av nordsida, slått saman med Sandnes kommune. Delar av nordsida av Lysefjorden vart frå same tidspunkt grensejustert til Strand kommune.

Kommunestyret i Forsand vedtok sommaren 2016, med 9 mot 8 representantar, å søkje om samanslåing med Sandnes kommune. Våren 2017 snudde fleirtalet i kommunestyret, og ein ynskte nå å stanse samanslåinga med Sandnes. I desember 2018 vedtok Kommunal- og moderniseringsdepartementet, etter eit innbyggarinitiativ, å grensejustere delar av nordsida av Lysefjorden til Strand.

Sommaren 2021 søkte ei aksjonsgruppe på Forsand om grensejustering av resten av gamle Forsand (Forsand-delen av nye Sandnes kommune) til Strand. Ei grundig utgreiing i regi av Statsforvaltaren i Rogaland vinteren 2022, på oppdrag frå departementet, framstilte ei slik grensejustering som formålstenleg. Også fleirtalet blant innbyggarane på Forsand var tydeleg. 78 prosent av dei røysteføre svarte i Statforvaltaren si undersøking. Av desse svarte 54 prosent at dei vil til Strand. I juni 2022 fatta også fylkestinget i Rogaland eit vedtak om å tilrå ei slik grensejustering. Kommunal- og distriktsdepartementet vedtok 22. juni 2022 at Forsand-delen av nye Sandnes likevel ikkje skulle grensejusterast.